Stúdentaráðskosningar í dag

Stúdentar við Háskóla Íslands kjósa sér fulltrúa í Stúdentaráð og til Háskólafundar í dag og á morgun. Fjórir listar eru í framboði; hinar gamalgrónu hreyfingar Röskva og Vaka auk Háskólalistans og Alþýðulistans. Vaka hefur meirihluta í Stúdentaráði og hefur haft undanfarin þrjú ár. Röskva réði ríkjum í ellefu ár þar á undan. Vaka, Röskva og Háskólalistinn eiga nú þegar fulltrúa í Stúdentaráði en Alþýðulistinn er nýr af nálinni. Hann hefur raunar yfir sér annan og léttari blæ en hinar hreyfingarnar og er til dæmis eitt baráttumála hans að skólabúningar verði teknir upp við Háskólann. Spennu gætir í Háskólasamfélaginu vegna kosninganna og hefur hörð kosningabarátta verið rekin síðustu daga. Þykir hún harðari en undangengin ár þó gamlir refir telji hana barnaleik miðað við það sem eitt sinn tíðkaðist. Kosningaþátttakan var rúm 30 prósent í fyrra og gera frambjóðendur sér vonir um að hún verði meiri í ár. Úrslit munu að líkindum liggja fyrir annað kvöld.