Exemkrem talið valda krabbameini

Heilbrigðisyfirvöld í Bandaríkjunum hafa úrskurðað að tvær gerðir áburðar sem notaður er á exem eigi að bera aðvörun þess efnis að mögulegt sé að notkun þeirra auki hættuna á húðkrabbameini. Þessar tvær gerðir heita Elidel og Protopic og hefur matvæla- og lyfjastofnun Bandaríkjanna (FDA) mælt gegn því að þessi krem séu notuð á ungbörn. Virkni þessarar gerðar áburðar felst í því að bæla niður ónæmiskerfið og hafa komið upp þrettán tilfelli krabbameins sem rakin eru beint til notkunar á kreminu. Exem er húðsjúkdómur sem lýsir sér í þurrkablettum, roða og þrota í húð. Protopic-áburður fæst hér á landi gegn lyfseðli.