Fíkniefni fundust við húsleit

Sextíu grömm af ætluðu amfetamíni og smáskammtur af LSD fundust við húsleit á Selfossi í gærmorgun. Húsleitin var gerð eftir að lögreglan á Selfossi stöðvaði bíll innanbæjar vegna gruns um að ökumaður væri undir áhrifum fíkniefna. Tvennt var í bílnum, bæði undir áhrifum. Fíkniefni fundust í bílnum og í kjölfarið var gerð húsleit í húsi í bænum. Við leitina fundust sextíu grömm af ætluðu amfetamíni, smáskammtur af LSD og töluvert af áhöldum til neyslu. Einnig voru þar tveir menn við neyslu fíkniefna. Fjórir voru handteknir í tengslum við málið, ökumaður og farþegi úr bílnum og mennirnir sem neyttu efnisins í húsinu. Er þetta ekki í fyrsta sinn sem lögreglan á Selfossi finnur sextíu grömm af amfetamíni í einu en í fyrra fann lögreglan sama magn á einum manni. Engu að síður er þetta óvenulega mikið magn og nánast útilokað að um efni til einkaneyslu hafi verið að ræða. Málið er í rannsókn en þar sem fólkið var tekið við neyslu eða undir áhrifum var ekki hægt að byrja yfirheyrslur fyrr en seinnipartinn í gær.