Hagnaður aukist um 50 prósent

Stjórnendur lyfjafyrirtækisins Actavis búast við að hagnaður fyrirtækisins aukist um allt að 50 prósent á næsta ári eftir kaupin á bandaríska samheitalyfjafyrirtækinu Amide. Kaupverðið nemur um 34 milljörðum íslenskra króna og er um stærstu fjárfestingu fyrirtækisins að ræða frá upphafi. Með kaupum á Amide nær Actavis fótfestu í Bandaríkjunum sem er gríðarlega mikilvægur markaður að komast inn á en þar fer fram helmingur allrar lyfjasölu í heiminum. Actavis mun fjármagna kaupin með eigin hlutabréfum, með útgáfu nýrra hluta og sambankaláni sem jafnframt verður notað til að endurfjármagna eldri skuldir félagsins. Sigurður Óli Ólafsson, framkvæmdastjóri fyrirtækjaþróunar hjá Actavis, er ánægður með kaupin. Hann segir fyrirtækið með álitlega veltu og hagnaður þess sé mjög góður. Sameiginleg fyrirtæki Actavis og Amide muni vaxa í framtíðinni á heimsvísu. Sigurður segir að stefnan sé að taka Amide inn í Actavis, en fyrirtækið sé með 67 lyf á markaði. Stjórnendur Actavis sjái einnig möguleika á því að fara með þau lyf sem seld hafi verið í Evrópu inn á Bandaríkjamarkað og markaðssetja þau í gegnum Amide. Þá sé einnig sá möguleiki að fara með lyf Amide inn á Evrópamarkað. Sameinað félag Actavis og Amide verður með yfir 500 lyf á markaði. Þá eru 136 lyf í þróun og skráningum og er þess vænst að félögin leggi sameiginlega inn að minnsta kosti 15 markaðsleyfaumsóknir í Bandaríkjunum á þessu ári. Í ársuppgjörstilkynningu frá Actavis segir að fyrsti ársfjórðungur þessa árs verði sá slakasti á árinu. Flest þeirra nýju lyfja sem sett verða á markað fara á þriðja ársfjórðungi og þar af leiðandi verða aðrir fjórðungar tekjuhærri. Stjórnendur Actavis gera ráð fyrir að sameiningin stuðli að því að hagnaður fyrir skatta aukist um allt að 50 prósent þegar á næsta ári og að hagnaður á hlut aukist um 30-35 prósent. Velta samanlagðs félags Actavis og Amide var 44 milljarðar íslenskra króna árið 2004 og var hagnaður fyrir skatta tæpir 10 milljarðar króna.