Milljónum Máka átti að skila

Milljónunum 35 sem veitt var til að ljúka barraeldi Máka á Sauðárkróki áttu að bjarga verðmætunum, segir Valgerður Sverrisdóttir, iðnaðar- og viðskiptaráðherra. Fénu hafi átt að skila. "Iðnaðarráðuneytið hafði ekki afskipti af því frekar, en sannleikurinn er sá að við höfum ekki fengið nema fjórtán milljónir af þessum 35 til baka. Nýlega var ákveðið að þær færu til endurráðstöfunar og færu til fiskeldisrannsókna í Hólaskóla," segir Valgerður. Fjármunirnir voru söluandvirði Steinullarverksmiðjunnar á Sauðárkróki. Ríkisstjórnin hafði ákveðið að helmingur þess mætti nota til uppbyggingar á atvinnusvæði verksmiðjunnar. Magnús Þór Hafsteinsson, í frjálslynda flokknum, hefur gagrýnt fjárveitinguna. Valgerður segir sjávarútvegsráðuneytið og Nýsköpunarsjóð hafa beitt sér fyrir því að fénu yrði veitt í að ljúka fiskeldinu: "Þá var fyrirtækið Máki komið í rekstrarörðugleika. Nýsköpunarsjóður stofnaði sérstakt fyrirtæki sem átti að bjarga verðmætum."