Bætt fyrir skort á stærðahagkvæmni

Áætlun um úthlutun útgjaldajöfnunarframlaga hefur verið samþykkt af ráðgjafarnefnd Jöfnunarsjóðs sveitarfélaga. Samkvæmt henni verður úthlutað 2.300 milljón krónum á þessu ári. Þessum framlögum er ætlað að mæta mismunandi útgjaldaþörf sveitarfélaga á grundvelli stærðarhagkvæmni þeirra og tekna. Það er Sveitarfélagið Skagafjörður sem fær hæsta framlagið, rúmar 118 milljónir. Skiptir þar mestu fyrir sveitarfélagið tæplega 59 milljóna króna framlag vegna íbúafjölda og tæplega 34 milljóna króna framlag vegna skólaaksturs í dreifbýli. Þá er áætlað að Fljótsdalshérað fái rúmlega 100 milljónir. Þrjú sveitarfélög fá úthlutað yfir hundrað þúsund krónur á hvern íbúa; Bólstaðarhlíðarhreppur, Áshreppur og Hvítársíðuhreppur. Þau eiga það sameiginlegt að vera tiltölulega fámenn sveitarfélög, með 73 til 113 íbúa og dreifbýl. Grímsnes- og Grafningshreppur, Ásahreppur, Fljótsdalshreppur, Skorradalshreppur, Skilmannahreppur, Hvalfjarðarstrandahreppur og Kópavogur eru þau sveitarfélög sem ekkert fá úthlutað að þessu sinni. Af þessum sveitarfélögum er Kópavogur langstærsta sveitarfélagið er þar búa tæplega 26 þúsund manns. Hin sveitarfélögin eru frá Skorradalshrepp með 64 íbúa til Grímsnes- og Grafningshrepps sem hefur 344 íbúa. Framlögin eru skert hjá þeim sveitarfélögum sem hafa hlutfallslega háar tekjur á íbúa miðað við önnur sveitarfélög og á það við þessi sveitarfélög utan Kópavog. Þar sem íbúafjöldi er í Kópavogi er yfir 22.000 falla íbúatengdu framlögin niður. Slík framlög eru skert á grundvelli stærðarhagkvæmni og hefst skerðing þegar íbúar eru fleiri en 2.400. Hafnarfjörður er þriðja stærsta sveitarfélagið, með 21.942 íbúa, þannig að ef íbúum þar fjölgar um fleiri en 58 á árinu, mun sveitarfélagið ekkert fá úthlutað á næsta ári úr þessum lið Jöfnunarsjóðs. Á þessu ári fær Hafnarfjörður rúm 700 þúsund krónur, sem gera um 32 krónur á íbúa. Reykjavík er annað tveggja sveitarfélaga sem fær undir þúsund krónur á íbúa, eða rétt tæpar 47 krónur. Reykjavík fær greitt á grundvelli fjölda þéttbýlisstaða umfram einn, fjarlægða innan sveitarfélags og fyrir skólaakstur í dreifbýli. Aðrar viðmiðanir við útreikning framlaganna er fækkun íbúa og snjómokstur í þéttbýli.