Fjögur lík fundin

Lík fjögurra sjómanna af flutningaskipinu Jökulfelli sem sökk á leið til Íslands í gærkvöldi fundust á ellefta tímanum í morgun og er nú leitað þeirra tveggja sem enn er saknað. Þrátt fyrir mikla leit í nótt fannst ekkert fyrr en bjart var orðið en skipinu hvolfdi norðaustur af Færeyjum og sökk fyrir miðnætti. Líkin voru tekin um borð í færeyska varðskipið Tjaldinn. Þyrla af danska eftirlitsskipinu Vedderen bjargaði fimm skipverjum sem voru á sundi í sjónum þegar þyrlan kom að. Síðan fannst mannlaus gúmmíbjörgunarbátur en ekkert sást til hinna sex, þar til líkin þrjú fundust í morgun. Skipverjarnir sem þyrlan bjargaði voru það hressir að þeir gengu óstuddir út úr henni eftir að hún lenti á varðskipinu. Vedderen er væntanlegur með þá til Færeyja síðar í dag. Átta skipverjanna eiga ríkisfang í Eistlandi og þrír í Rússlandi. Fokker-vél Landhelgisgæslunnar tekur þátt í leitinni ásamt þyrlu frá Færeyjum og frá Vedderen auk nokkura annarra véla. Veður fer nú heldur versnandi á leitarsvæðinu. Ekkert liggur enn fyrir um tildrög slyssins enda náðist aldrei talstöðvarsamband við skipstjórnarmenn eftir að sjálfvirkur neyðarsendir um borð fór í gang. Ýmislegt bendir því til þess að skipið hafi oltið á skammri stundu, en þó ekki skemmri en svo að skipverjarnir, sem björguðust, höfðu komist í flotbúninga. Sex metra ölduhæð var á svæðinu þegar slysið varð og vindur 15 metrar á sekúndu sem að öllu jöfnu hefði ekki átt að ógna öryggi skipsins. Það virðist hafa marað á hvolfi í 2-3 klukkustundir en um miðnætti var það sokkið. Samskip hefur haft skipið á leigu í rúmt ár og var það lestað 2000 tonnum af stáli sem það átti að flytja frá Lettlandi til Reyðarfjarðar og Reykjavíkur. Skipið gat borið talsvert meiri farm þannig að ekki var það oflestað.