Mildi að enginn lést í lestarslysi

Ástralska lögreglan telur mikla mildi að enginn skyldi hafa látist þegar lest með 163 farþegum fór út af sporinu við bæinn Bundaberg um 400 kílómetra norður af Brisbane. Meira en 150 manns slösuðust í slysinu, þar af 35 alvarlega. Ekki er vitað nákvæmlega á hversu mikilli ferð lestin var þegar hún fór út af sporinu, en hún nær allt að 160 kílómetra hraða á klukkustund. Að sögn lögreglu er ekki heldur ljóst hvers vegna lestin fór út af sporinu. Vonast er til þess að svarti kassinn, sem náðist heill úr brakinu, varpi einhverju ljósi á hvað gerðist.