Afganistan að verða fíkniefnaríki

Afganistan er komið langt á leið með að verða fíkniefnaríki og til marks um það er að ópíumframleiðsla hefur aukis.t um nær tvo þriðju á einu ári. Þetta kemur fram í nýrri skýrslu sem unnin var fyrir Sameinuðu þjóðirnar. Þar er hvatt til þess að hersveitir Atlantshafsbandalagsins í Afganistan ráðist gegn fíkniefnaframleiðslu "Það væru söguleg mistök að skilja Afganistan eftir í greipum ópíumframleiðenda þegar nýbúið er að frelsa landið úr höndum Talibana og al-Kaída," sagði Antonio Maria Costa, framkvæmdastjóri fíkniefna- og glæpadeildar Sameinuðu þjóðanna. Samkvæmt skýrslunni um ópíumframleiðslu í Afganistan var það aðeins óhagstætt veðurfar sem kom í veg fyrir að nýtt met yrði sett í framleiðslu þess í ár. Þrátt fyrir það standa Afganar undir 87 prósentum af allri ópíumframleiðslu í heiminum. Ópíumframleiðsla er orðin helsti vaxtarbroddur afgansks atvinnulífs og stendur undir meira en 60 prósentum af landsframleiðslu.