Ráðstefnu frestað í Írak

Ráðstefnu sem halda átti í Írak á laugardaginn hefur verið frestað til 15. ágúst að beiðni Sameinuðu þjóðanna. Forsvarsmenn ráðstefnunnar neita því að hryðjuverkin í gær hafi orðið þess valdandi að ákveðið var að fresta henni. Á ráðstefnunni átti að velja hundrað menn í þjóðarráð, sem hafa á yfirumsjón með verkum bráðabirgðastjórnarinnar í Írak þar til kosningar fara fram í janúar á næsta ári. Von var á um 1000 sendifulltrúm og stjórnmálamönnum til Bagdad vegna ráðstefnunnar. En vegna ráðlegginga Sameinuðu þjóðanna, sem kvöttu til betri undirbúnings var hins vegar ákveðið að fresta ráðstefnunni til 15. ágúst. Talið er að hryðjuverk og bardagar gærdagsins, þar sem 120 mann létu lífið, hafi einnig nokkuð að segja um ákvörðunina, þrátt fyrir að opinberlega neiti forsvarsmenn ráðstefnunnar því. Með tilliti til þeirra hryðjuverkaöldu sem geysað hefur undanfarið í Írak og náði hámarki í gær, verður að teljast líklegt að ráðstefnan hefði orðið kjörið skotmark fyrir hryðjuverkamenn og höfðu skipuleggjendur lýst yfir áhyggjum þar að lútandi. Eins og fram kom í fréttum í gær létust tæplega 70 manns þegar öflug bílsprenging sprakk í Baquba. Fórnarlömb árásarinnar, sem voru nær einvörðungu óbreyttir borgarar, voru bornir til hinstu hvílu í dag og vottuðu hundruðir manna þeim virðingu sína með því að fylgja þeim til grafar.