Yfir 90 þúsund látnir

Mikil skelfing hefur gripið um sig á Indlandi vegna viðvörunar yfirvalda í landinu um að önnur flóðbylgja kunni að ríða yfir fljótlega. Hamfaraflóðin í Suðaustur Asíu hafa kostað hátt í hundrað þúsund mannslíf, þar af rúmlega fimmtíu þúsund bara á Indónesíu. Indversk stjórnvöld vöruðu í morgun við nýjum flóðbylgjum á þeim svæðum landsins, sem verst urðu úti í flóðbylgjunum á annan í jólum, eftir jarðskjálfta við eyna Súmötru, sem mældist 9 á Richter. Lögreglubílar óku um með gjallarhorn og var fólk hvatt til að forða sér frá ströndinni. Sjónarvottar segja að skelfingu lostnir íbúar forði sér nú inn í land til öryggis. Fyrir stundu var greint frá því á bresku Sky-sjónvarpsstöðinni að 92 þúsund manns hefðu farist, þegar flóðbylgjurnar riðu yfir Indlandshaf, en óttast er að þessi tala eigi enn eftir að hækka til muna, og jafnvel tvöfaldast. Alþjóða Rauði krossinn telur að fórnarlömbin við Indlandshaf kunni að vera vel á annað hundrað þúsund. Tugmilljónir manna eiga um sárt að binda og leita í örvæntingu sinni að ástvinum sem saknað er eftir hörmungarnar. Matar og vatnsskortur hefur þegar gert vart við sig víða og farsóttir og hungursneyð ógna nú milljónum manna. Yfirvöld á Indónesíu hafa staðfest að minnst 52 þúsund manns hafi látið lífið í hamfaraflóðunum, en sú tala hækkar vafalítið á næstunni, þar sem enn hefur ekki tekist að fá nákvæmar upplýsingar um mannfall á mörgum einangruðum svæðum. Óttast er að minnst tvö hundruð þúsund manns sem störfuðu við ferðaþjónustu í Taílandi missi vinnu sína vegna hamfaraflóðanna í suðaustur Asíu. Þetta kemur fram í taílenska dagblaðinu The Nation í dag. Ferðaþjónusta hefur verið mikilvægur iðnaður í landinu um árabil og skilað þjóðarbúinu sem samsvarar um sjö hundruð milljörðum íslenskra króna í tekjur árlega. Eyjarnar Phúket, Krabi og Phang Nga hafa skilað langmestum hagnaði hingað til, en þær urðu allar illa úti í flóðunum. Ljóst er að afleiðingar hamfaraflóðanna í suðaustur Asíu eru skelfilegar þar sem milljónir hafa misst lífsviðurværi sitt, en mörg sjávarþorp þurrkuðust út og fiskiskip og hafnir eyðilögðust þegar flóðbylgjur sópuðu þeim burt.