Domingo til Íslands

Þriðji tenórinn kemur til landsins í mars og heldur tónleika í Egilshöll í Grafarvogi. Fyrir aldarfjórðungi kom Pavarotti, Carreras árið 2001 og á næsta ári mun Placido Domingo, síðasti söngvarinn í þríeyki frægustu tenóra heims, heiðra Íslendinga með nærveru sinni.

Hann heldur tónleika með Sinfóníuhljómsveit Íslands í Egilshöll sunnudaginn 13. mars næstkomandi. Stjórnandi verður Evgení Kohn sem hefur unnið með flestum helstu óperustjörnum heims og í öllum stóru óperuhúsunum. Seldir verða 5000 miðar og hefst miðasala 30. nóvember. Domingo heldur ekki nema tíu tónleika allt næsta ár og hafði sérstaklega óskað eftir því við umboðsmann sinn að fá tækifæri til að syngja á Íslandi. Hann er líka vel kunnugur okkar íslensku stjörnum á óperusviðinu, Kristjáni Jóhannssyni og Kristni Sigmundssyni. Það er LotionPromotion sem flytur stórsöngvarann inn, sama fyrirtæki og annaðist tónleikana með Carreras í Laugardalshöll um árið.