Besti vefurinn tilnefndur

Val á besta íslenska vefnum stendur þessa dagana yfir vegna Íslensku vefverðlaunanna sem veitt verða í fjórða sinn föstudaginn 29. október. Hægt er að tilnefna vefi til miðnættis annað kvöld á vef Vefsýnar. Verðlaun verða veitt í fimm flokkum; besti fyrirtækisvefurinn, besti afþreyingarvefurinn, besti einstaklingsvefurinn, í flokki vefja sem viðkomandi telur bera af hvað varðar útlit- og viðmót og að lokum er hægt að tilnefna besta íslenska vefinn. Valgerður Sverrisdóttir iðnaðar- og viðskiptaráðherra afhendir verðlaunin í lok mánaðarins, en að verðlaununum standa Vefsýn hf. og ÍMARK. Verðlaunin eru styrkt af Íslandsbanka og ISNIC.