Sprenging utan við lögreglustöð

Að minnsta kosti 10 manns létust og 50 særðust í sjálfsmorðsárás við lögreglustöð í Bagdad í morgun. Ekkert lát virðist á árásum þrátt fyrir að Írakar hafi tekið við stjórn landsins. Bifreið eða einhvers konar bensíntrukki var ekið inn á bílastæði fyrir framan lögrelgustöðina um átta leytið í morgun en þá voru flestir á leið til vinnu sinnar. Fjölmargir lögreglumenn stóðu nálægt bílastæðinu og hlýddu á fyrirmæli yfirmanna sinna og voru í þann veginn að fara á vakt þegar bensíntrukkurinn sprakk. Mikill gýgur myndaðist í jörðinni og nærliggjandi hús eru ónýt. Bílaverkstæði á móti löreglustöðinni lenti illa í sprengingunni þar sem nokkrir starfsmenn létust. Nokkrum mínútum síðar var sprengju skotið að slökkviliðsstöð skammt frá höfuðstöðvum Bandaríkjahers þar sem einn maður særðist. Þrátt fyrir að Írakar hafi tekið við stjórn landsins hefur ekkert lát orðið á árásum. Í síðustu viku sprakk sprengja við höfuðstöðvar Bandaríkjahers og þar létust 11. Sama dag létust 10 aðrir í sprengingu fyrir utan lögrleglustöð norðan við Bagdad. Á laugardag reyndi maður að drepa dómsmálaráðherra Íraks með þeim afleiðingum að fimm lífverðir hans létust. Filipseyingar ætla að draga her sinn út úr Írak, 11 eru farnir heim en aðrir 40 undirbúa heimför. Ákvörðun þeirra kemur í kjölfar þess að Filipseyingur situr í haldi hryðjuverkamanna og hefur honum verið hótað lífláti hverfi herinn ekki frá Írak. Bandaríkjamenn hafa gagnrýnt stjórnvöld á Filipseyjum harðlega fyrir að gefa eftir í baráttunni gegn hryðjuverkum. Pólverjar hafa sömuleiðis ákveðið að fækka sínum hermönnum í Írak en þess í stað færa þá yfir til Afganistans og færa þá undir stjórn NATO í landinu.