Liggur í loftinu í heilsunni

Nýlegar rannsóknir vísindamanna í Bandaríkjunum benda til að vírus geti verið valdur að brjóstakrabbameini kvenna. Vísindamennirnir hafa uppgötvað vírus sem þeir kalla MMTV í sýnum kvenna sem þjást af sjúkdómnum. Vitað er að MMTV-vírusinn veldur brjóstakrabbameini í músum, en rannsóknir á vírusnum hjá konum eru enn á byrjunarstigi. Reykingabann á Írlandi var nýlega leitt í lög eins og kunnugt er. Þrátt fyrir að allir séu sammála um að reykingar séu heilsuspillandi eru reykingamenn ósáttir og pöbbaeigendur uggandi um afkomu sína. Ástæðan er sú að reykingamenn láta ekki lengur sjá sig á barnum og pöbbaeigandi einn á Írlandi hefur nú í trássi við lögin leyft reykingar á ný. Hann segist bjóða stjórnvöldum byrginn því salan á pöbbnum hafi minnkað um 60% frá því reykingabannið var sett í mars. "Ég er á að fara á hausinn hvort sem er ," segir hann og margir kollegar hans taka í sama streng. Til umræðu hefur verið að setja reykingabann á bjórkrám á Íslandi innan tíðar. "Hryðjuverkamenn eru gjarnan sagðir geðveilir og haldnir ofsóknarbrjálæði, en hvorugt er rétt," segir Dr. Andrew Silke, prófessor í sálarfræði við háskólann í Leicester. Rannsóknir sem gerðar voru á 180 meðlimum Al-Qaeda og öðrum meðlimum hryðjuverkahópa leiða í ljós að hryðjuverkamenn eru ekki á nokkurn hátt geðveikir. Þeir stjórnast hins vegar af hefndarþorsta. "Það eru pólitískar ástæður fyrir því en ekki læknisfræðilegar," segir Silke, "og á ekkert skylt við geðveiki."