Lestur hættulegur sjóninni

Helsta ástæðan fyrir aukinni nærsýni meðal Asíubúa er sú að lífsstíll þeirra hefur tekið miklum breytingum. Nú er svo komið að þar sem ástandið er verst, í Singapúr, eru fjórir af hverjum fimm átján ára piltum sem gegna herþjónustu nærsýnir. Fyrir þrjátíu árum var einungis fjórði hver nýliði nærsýnn. Í grein í New Scientist segir að ein nærtækasta skýringin á því að sífellt fleiri ungmenni greinist nærsýn sé sú að þau einblína mun meira en áður á hluti sem eru nálægt þeim, einkum tölvuskjái, sjónvörp og bækur. Augað aðlagar sig að þessu til að minnka álagið sem þarf til að sjá hluti í fókus. Þetta gerir að verkum að augað á erfiðara með að sjá fjarlægari hluti í fókus. Því hefur lengi verið haldið fram að meiri tíðni nærsýni í Asíu megi rekja til genasamsetningar. Þessu vísa vísindamennirnir Morgan og Kathryn Rose við Háskólann í Sidney á bug, eftir að hafa kannað yfir 40 rannsóknir. Þau segja meiri tengsl milli mikils lestrar og nærsýni en uppruna fólks og nærsýni. Talið er að nærsýni kunni að aukast á Vesturlöndum rétt eins og hún hefur gert í Asíu.