Agaður og ber velgengni vel

Maður vikunnar - Arnaldur Indriðason, rithöfundur. Alltaf er ánægjulegt þegar vel gengur hjá Íslendingum í útlöndum. Dæmi um mann sem slegið hefur rækilega í gegn er spennusagnahöfundurinn Arnaldur Indriðason. Hann er tvímælalaust einn vinsælasti rithöfundur þjóðarinnar og glæpasögur hans svo mikið lesnar að til undantekningar heyrir ef bækur hans eru ekki á metsölulistum bókabúða hér. Núna hefur St. Martins Press í Bandaríkjunum keypt útgáfurétt tveggja bóka Arnaldar, Mýrinnar og Grafarþagnar, en þær eru þegar orðnar metsölubækur í Evrópu. Það þykir hins vegar sæta tíðindum að hafa vakið áhuga bandarískra bókaútgáfa því löngum hefur þótt erfitt að koma þýðingum á framfæri í Bandaríkjunum, hvað þá þýddum glæpasögum, því þar er löng hefð fyrir slíkum skrifum og mikið framboð innlendra höfunda. Arnaldur hefur skrifað sjö skáldsögur og vinnur þessa dagana að þeirri áttundu. Bækur hans hafa verið seldar til 19 landa og fimm heimsálfa, ef Bandaríkin eru talin með. Hér heima hafa bækurnar selst gífurlega vel. Fyrsta upplag bæði Bettýar fyrir jólin í fyrra og Raddarinnar árið áður var 10 þúsund eintök, en fyrsta prentun í slíku magni var fáheyrð fyrir þann tíma. Bækurnar tvær sem nú á að gefa út í Bandaríkjunum hafa selst í þrjú hundruð þúsund eintökum í Þýskalandi. Því hefur verið haldið fram að fáir íslenskir rithöfundar hefðu þolað jafn vel þá miklu velgengni sem Arnaldur Indriðason hefur notið með ritverk sín. Arnaldur er hæglætur maður, jafnvel feiminn. Ekki er sagt vera til í honum stærilæti eða mont og hefur hann haldið sér fyrir utan þær klíkur sem myndast hafa í bókmenntaheiminum hér heima. Til marks um það er að hann hefur heldur viljað halda sér fyrir utan sviðsljós fjölmiðla. Þá er í hópi rithöfunda nokkur virðing borin fyrir Arnaldi fyrir hversu vel honum hefur gengið og jafnvel talað um að sérstakt sé hvernig hann á sér enga óvildarmenn innan stéttarinnar, þrátt fyrir velgengnina. Ef til vill á það þó rót sína í því að hingað til hefur verið litið á glæpasögur sem sérdeild bókmennta og öðrum rithöfundum hér því e.t.v. ekki þótt sér standa ógn af Arnaldi, sem þó er óumdeilanlega "alvöru" rithöfundur. Hann stundar afar öguð vinnubrögð, sest niður við vinnu sína að morgni og skilar sínu dagsverki við skrifin. Arnaldur er sagður vera jarðbundinn maður sem komist hefur þangað sem hann er með mikilli elju og með því að virkja hæfileika sína af miklum aga. Arnaldur Indriðason er 43 ára gamall, fæddur og búsettur í Reykjavík, sonur Indriða G. Þorsteinssonar rithöfundar og Þórunnar Ólafar Friðriksdóttur húsmóður. Hann er giftur og á þrjú börn. Arnaldur útskrifaðist sem stúdent frá Menntaskólanum við Hamrahlíð árið 1981 og lauk BA-prófi í sagnfræði frá Háskóla Íslands árið 1996. Arnaldur vann um skeið sem blaðamaður á Morgunblaðinu eftir útskrift úr menntaskóla og síðar sem kvikmyndagagnrýnandi blaðsins, árin 1986 til 2001. Auk skáldsöguskrifanna hefur Arnaldur unnið útvarpsleikrit upp úr þremur þeirra sem flutt voru í Ríkisútvarpinu. Þá er hann margverðlaunaður fyrir skrif sín, hefur meðal annars tvisvar hlotið Glerlykilinn, norrænu glæpasagnaverðlaunin. Fyrst fyrir Mýrina árið 2002 og svo aftur fyrir Grafarþögn í fyrra. Þá hefur Arnaldur hlotið styrki frá Kvikmyndasjóði Íslands til að skrifa handrit upp úr bókunum Dauðarósum og Napóleonsskjölunum. Í burðarliðnum er einnig kvikmyndun á Mýrinni í leikstjórn Baltasars Kormáks. Verið er að leggja lokahönd á fjármögnun kvikmyndarinnar og líður að því að farið verði að skipa í hlutverk og standa vonir til að hægt verði að taka myndina upp í byrjun næsta árs. Þessa dagana er Arnaldur að leggja lokahönd á áttundu skáldsögu sína sem koma á út fyrir jólin. Vinnuheiti bókarinnar er Kleifarvatn og söguhetjurnar aðdáendum að góðu kunnar.