Þeir sem að reykja

Reykingarmenn sem hætta að reykja fyrir 35 ára aldur geta náð sama heilbrigði og þeir sem aldrei hafa reykt. Þetta er niðurstaða nýrrar bandarískrar rannsóknar. Það tekur samt tímann sinn að jafna sig og í rannsókninni kom í ljós að einungis þeir sem höfðu ekki reykt í 15 ár eða meira höfðu náð jafnöldrum sínum í heilbrigði og hreysti. Dr. Donald H. Taylor, prófessor við Duke-háskóla í Norður-Karólínu, sem stýrði rannsókninni varar við að fólk taki niðurstöðunum sem svo að það sé í lagi að reykja til 35 ára aldurs. "Vandamálið er að um leið og maður byrjar að reykja þá verður erfitt að hætta." Í skýrslunni segja Taylor og félagi hans dr. Truls Ostbye að margir einblíni aðeins á það að reykingar drepi en gleymi að hugsa um að þær hafa líka afar slæm áhrif á árin sem maður lifir. Í rannsókninni töluðu Taylor og Ostbye við yfir 20.000 manns, miðaldra og eldri. Þeir komust að því að reykingarfólk missir fyrr heilsu en þeir sem ekki reykja. Þeir komust einnig að því að fólk sem hafði hætt að reykja 15 árum áður en rannsóknin var gerð, og hafði hætt á aldrinum 35-45 voru jafn heilbrigð og þeir sem aldrei höfðu reykt.