Vörn gegn sjúkdómum

Margir sem þjást hafa af ýmsum kvillum eins og síþreytu, psoriasis og háum blóðþrýstingi hafa fundið mikinn mun á sér við það að drekka hrásafa og neyta heilnæmari fæðu. Sumir hafa orðið það góðir að þeir hafa hreinlega ekki lengur þurft á lyfjum við þessum kvillum að halda. Í bókinni "The Juice Lady's Guide to Juicing for Health" eru margvíslegar upplýsingar um ýmsar jurtir sem notaðar eru í hrásafa og þar er einnig sagt frá því hvaða tegundir virka best gegn hverjum sjúkdómi. Höfundur bókarinnar, Cherie Calbom, átti sjálf við veikindi að stríða sem barn og um þrítugt var hún orðin illa haldin af síþreytu. Þegar hún loksins leiddi hugann að því að samhengi væri á milli næringar og heilsufars minnkaði hún snarlega við sig alla sætindaneyslu, sem var á mjög háu stigi. Hún sneri algerlega við blaðinu og í dag heldur hún sér algerlega að hrásöfum og heilnæmu fæði og hefur aldrei liðið betur.