Nauðgað til að tryggja giftingu

Chaltu Jeylu var rænt þegar hún var þrettán ára, henni haldið í gíslingu og nauðgað trekk í trekk þar til hún varð ófrísk. Nauðgarinn var 24 ára karlmaður sem naut aðstoðar fjórtán vina sinna við að ræna henni. Tilgangur hans var að fá hana fyrir eiginkonu og sleppa ódýrt frá heimanmundinum sem venja er að eþíópískir brúðgumar borgi foreldrum brúðarinnar. Saga Chaltu er aðeins ein af mörgum í landi þar sem mannrán og nauðganir eru algeng aðferð karlmanna við að ná sér í brúðir. Þetta er ódýr leið til að ná sér í brúði. Í stað þess að borga foreldrum stúlkunnar andvirði allt að 30.000 króna fyrir að fá að kvænast henni geta menn sloppið með nokkur þúsund króna greiðslu ef þeir ræna stúlkunum fyrst og nauðga þeim. Þar ræður að skömm stúlknanna er svo mikil í samfélaginu að aðrir eru ólíklegir til að vilja kvænast þeim. "Ég elskaði hann ekki. Fyrir mig er mikilvægast að elska þann sem ég er með," sagði Chaltu sem flýði frá manninum sem rændi henni, nauðgaði og kvæntist síðan. Flótti hennar naut ekki skilnings fjölskyldunnar, faðir hennar afneitaði henni, sem og aðrir ættingjar og nágrannar. Einungis móðir hennar tók afstöðu með henni en mátti sín lítils. Nú nýtur Chaltu aðstoðar heilbrigðis- og menntakerfisins líkt og margar stúlkur sem hafa mátt reyna það sama og hún og hafa flúið þá menn sem þær hafa verið knúnar til að giftast. Þar verða þær þó einnig varar við fordóma í sinn garð frá þeim sem eiga að hjálpa þeim. "Gæti ég kvænst stúlku sem hefur verið bjargað eftir brottnám? Nei, það væri of mikil skömm fyrir mig," sagði Tsegaye Ayane, næstæðsti embættismaður skólaráðsins þar sem Chaltu býr. Meðan stúlkurnar búa við ótta og dekkri framtíð en ella, sumar illa leiknar eftir ofbeldið sem þær hafa verið beittar - eins og hin tólf ára Samara Umare sem er lömuð á vinstri hendi - er ekkert aðhafst til að refsa mönnunum. "Ég vil að honum verði refsað en ég veit ekki hvað gerist," sagði hin þrettán ára Alfu Haji Aman sem var nauðgað og kærði ræningja sinn, þvert á ráð foreldra hennar. Hún er ekki bjartsýn á að nauðgara sínum verði refsað. "Siðirnir, hefðin og lögin eru hagstæð körlunum," sagði hún.