Stoppuðu flugræningja og slepptu

Tveimur klukkustundum áður en ein af flugvélunum sem var rænt 11. september 2001 lenti á bandaríska varnarmálaráðuneytinu tóku flugvallarstarfsmenn fjóra af fimm flugræningjum til hliðar vegna grunsemda sem vöknuðu og málmleitartækis sem fór í gang. Leit á mönnunum leiddi ekkert í ljós og því var þeim hleypt í gegn. Í kjölfarið rændu þeir flugvélinni og flugu henni á varnarmálaráðuneytið. Þetta kemur fram í lokaskýrslu nefndarinnar sem hefur rannsakað aðdraganda hryðjuverkárásanna í New York og Washington. Sérfræðingar segja öryggisgæslu á Dulles flugvelli í Washington, sem mennirnir fóru um, ekki hafa gert meira en að uppfylla lágmarkskröfur í mesta lagi. Flugræningjunum hafi verið hleypt í gegn án þess að fyrir lægi ástæða þess að málmleitartækin fóru af stað. Það væri óásættanlegt. 58 farþegar, sex manna áhöfn og 125 starfsmenn varnarmálaráðuneytisins létu lífið í árásinni. Bandaríkin gátu ekki varið sig gegn árásinni 11. september vegna þess að stjórnvöld höfðu ekki tekið nægilega mikið mark á þeirri ógn sem stafaði af al-Kaída. Þetta er niðurstaða rannsóknarnefndarinnar. Tom Kean, formaður nefndarinnar, sagði að ekkert af því sem stjórnvöld gerðu til að berjast gegn al-Kaída hafi orðið til að trufla eða seinka árásunum. "Þeir brutust í gegnum varnir öflugasta ríkis heims. Þeir ollu þjóð okkar miklu óbærilegu sálrænu tjóni og á sama tíma kollvörpuðu þeir heimsmyndinni sem við bjuggum við," sagði Kean um hryðjuverkamennina. Þrátt fyrir að fundið sé að viðbrögðum stjórnvalda eru hvorki núverandi né fyrrverandi forseti, George W. Bush eða Bill Clinton, sakaður um að hafa brugðist. Mælt er með því að komið verði á fót einni stofnun sem hefur yfirumsjón með starfsemi leyniþjónustustofnana. Með því megi bæta varnir Bandaríkjanna gegn hryðjuverkaárásum í framtíðinni.