Pearl Jam órafmögnuð

Órafmagnaðir tónleikar frá því í fyrra með rokksveitinni Pearl Jam verða gefnir út á tvöfaldri plötu í næsta mánuði. Platan kallast Live at Benaroya Hall og var tekin upp í Seattle, heimaborg Pearl Jam, á tónleikum til styrktar hjálparstofnuninni Youthcare. 24 lög eru á plötunni. Á meðal þeirra eru "Man of the Hour," úr kvikmyndinni Big Fish, "Fatal," af plötunni Lost Dogs og "Around the Bend," sem sveitin hefur ekki spilað á tónleikum í sex ár. Einnig eru þar tökulögin "25 Minutes to Go" sem Johnny Cash gerði vinsælt, "I Believe in Miracles" með Ramones og "Masters of War" eftir Bob Dylan. Gamlir slagarar á borð við "Nothing as It Seems, Black, Immortality og Daughter fá einnig að fljóta með.