Fréttahaukur hleypur á sig

Frægðarsól bandaríska fréttamannsins Dan Rather hefur hnigið hratt eftir að upp komst að minnisblöð sem sýnd voru í fréttaþættinum "60 Minutes II" voru fölsuð. Í blöðunum kom fram að George W. Bush, forseti Bandaríkjanna, hefði notið sérstakra forréttinda á meðan hann gegndi herþjónustu í þjóðvarðliði Texas-ríkis og óhlýðnast skipunum. Rather baðst afsökunar í liðinni viku á mistökunum en þá hafði tæpur hálfur mánuður liðið síðan þættinum var sjónvarpað á CBS sjónvarpsstöðinni um öll Bandaríkin. Repúblikanar eru að vonum æfir og þykir þessi aldni fréttahaukur hafa beðið gífurlegan álitshnekki af málinu. Dan Rather er kominn hátt á áttræðisaldur og hefur lifað og hrærst í heimsfréttunum síðustu hálfa öldina. Hann vakti fyrst verulega athygli árið 1963, þá ungur fréttamaður í Texas, þegar Kennedy Bandaríkjaforseti var myrtur í Dallas. Æ síðan hefur hann verið í eldlínunni og flutt löndum sínum fréttir af helstu viðburðum samtímans. Til dæmis kom hann til Íslands árið 1986 vegna leiðtogafundar þeirra Reagans og Gorbachevs. Ólafur Sigurðsson var þá fréttamaður hjá Sjónvarpinu og hafði af honum örlítil kynni. "Hann hafði mikla aðstöðu við Félagsstofnun stúdenta við Hringbraut og lýstust húsin við Tjörnina upp þegar kösturunum var beint að sviðsmyndinni hjá honum." Óli Tynes, fréttamaður, hitti Rather tíu árum síðar á framboðsfundi Bill Clintons í Virginíuríki. "Hann var ósköp svipaður útlits á skjánum nema ögn lægri í loftinu og auðvitað ekki eins fínt klæddur heldur í gallabuxum og safarí-jakka. Hann bauð af sér góðan þokka og var alþýðlegur í framkomu við okkur hina." Ólafur bendir hins vegar á að Rather sé óvinsæll meðal margra starfsbræðra sinna því hann þyki harðdrægur og sínkur á sviðsljósið. Hafa samstarfsmenn hans hrakist úr starfi vegna hans, til dæmis fréttakonan Connie Chung.. Burtséð frá atburðum síðustu daga þá eru þeir Ólafur og Óli sammála um að Rather sé afar snjall fréttamaður sem hefur unnið sig upp í fréttastjórastjórastöðuna hjá CBS algerlega á eigin verðleikum. Hins vegar greinir þá á um hvaða áhrif fölsunarmálið mun hafa á stöðu Rathers. Á meðan Óli telur að Bandaríkjamenn verði fljótir að fyrirgefa honum mistökin þá segir Ólafur að hann sé heppinn að hafa haldið starfinu eftir að hafa beðið alltof lengi með að biðjast afsökunar. "Hann sem fréttastjóri hjá stöðinni verður að taka ábyrgð á svo skelfilegum mistökum." Eins og títt er um bandaríska fjölmiðlamenn þykir Rather hallur undir Demókrataflokkinn og það gerir stöðu hans enn verri í þeirri orrahríð sem hann stendur nú í. Búast má því við að hann setjist fljótlega í helgan stein, rúinn trausti.