Feimumst vonandi í allt sumar

Fame Sumarsöngleikurinn verður frumsýndur í kvöld í Vetrargarðinum í Smáralind en nú þegar hafa sex þúsund manns pantað miða á söngleikinn. @ljosmyndari: Björg Vigfúsdóttir tilv: FRUMSÝNING ÁLFRÚN HELGA ÖRNÓLFSDÓTTIR "Við byrjuðum snemma á dansæfingum og erum komin í mjög gott form," segir leikkonan Álfrún Helga Örnólfsdóttir en söngleikurinn Fame verður frumsýndur í Smáralind í kvöld og þar ætlar hún að gera garðinn frægan ásamt öðru hæfileikafólki. Fame segir frá sorgum og sigrum í skólagöngu ungra listanema. "Þetta byrjar á fyrsta skóladegi og endar á útskriftardaginn þremur árum seinna. Ég leik Sigríði leiklistarnema sem tekur námið ekkert sérstaklega alvarlega til að byrja með," segir Álfrún. "Hún verður skotin í bekkjarfélaga sínum Hilmari Snæ, sem er leikin af Jónsa, en hann er svo djúpt sokkin í leiklistarpælingarnar að hann hefur engan áhuga á stelpum og fer bara í vörn þegar Sigríður sýnir honum einhverjar tilfinningar. Það er stiklað á stóru á þessum þremur árum en Sigríður breytist mjög mikið á þessu tímabili og finnur sig bæði sem manneskju og leikkonu." Álfrún útskrifaðist sjálf úr listaskóla fyrir ári síðan og segir sumt í leikritinu svipa til eigin skólagöngu. "Því miður var ekki mikið um að fólk brysti óvænt út í söng og balletdans á göngum skólans sem ég var í úti í London en vissulega minnir margt í leikritinu á skólagönguna. Þarna er til dæmis að finna einstaklinga sem hafa mjög mikla athyglisþörf og svo heyrir maður frasa frá kennurunum sem maður kannast við eins og til dæmis það að maður eigi aldrei að biðjast afsökunar á sér í leikhúsinu jafnvel þó maður geri mistök." Sex þúsund miðar hafa nú þegar verið seldir á söngleikinn Fame og er því greinilegt að mikil eftirvænting ríkir fyrir söngleiknum. "Það er mjög góð stemning fyrir þessu og í leikhópnum er mikil spenna, gleði og kraftur. Fame er blanda af skemmtilegum lögum, kraftmiklum dansi og mátulega mikilli skírskotun í íslenskan raunveruleika. Það voru áhorfendur á rennslum bæði í gær og fyrradag og það gefur mann auka kraft hvað allir virðast hrifnir," segir Álfrún og bætir við. "Við erum til í slaginn og eigum vonandi eftir að feimast í allt sumar."