Áhrif umhverfis á sköpunargáfu

"Það hafa svo fáar rannsóknir í gervigreind verið gerðar um sköpunargáfuna," segir Hrafn Þorri Þórisson, 20 ára fjölbrautaskólanemi, sem fór með sigur úr býtum í keppni ungra vísindamanna sem haldin var á vegum Háskóla Íslands í vor. Verkefni Hrafns hefur vakið athygli en það fjallaði um áhrif umhverfisins á sköpunargáfuna. "Ég bjó til hermilíkan af veröld þar sem umhverfið lýtur ákveðnum reglum eins og náttúran okkar. Í þessum gerviheimi búa skordýr og á löngu tímabili þróa þau með sér hæfileika og búa til ráðagerðir og plön með sérstökum útbúnaði í heilanum." Tilgátuna í rannsókninni segir Hrafn vera þá að því flóknari sem umhverfið sé þeim mun meiri möguleika hafi dýrin sem lifa þar til að skapa eitthvað nýtt að eigin frumkvæði. "Ef við setjum okkur í spor örvera þá er umhverfi þeirra einn risastór húðflötur, ólíkt okkar umhverfi sem býður upp á að við þurfum að sjá og skynja form. Þannig má álykta að stærðin og formið á okkur manneskjunum, miðað við umhverfi okkar, geti verið stór partur af því að við höfum þróað með okkur þann heila sem við höfum og að þar liggi ástæðan fyrir því að við séu svona uppátækjasöm og klár." Hrafni þykir sköpunargáfan merkilegt fyrirbæri. "Tölvur eru með reiknigetu á við okkur en það vantar í þær allt frumkvæði. Ef við gætum gefið tölvunum sköpunargáfu þá gætu þær án efa komið okkur verulega á óvart," segir Hrafn sem útilokar ekki að tölvur framtíðarinnar komi til með að búa yfir sköpunargáfu. Rannsóknir Hrafns hafa vakið athygli út fyrir landsteinana og honum hefur verið boðið að fjalla um hugmyndir sínar á vísindaráðstefnu sem haldin verður á Spáni í ágúst. Keppnin sem haldin er á vegum Háskóla Íslands hér heima er forkeppni fyrir alþjóðlega vísindakeppni ungs fólk og til að taka þátt í þeirri keppni heldur Hrafn til Írlands í lok september.