Erlent

Ástin er engin tilviljun

Ástin er engin tilviljun. Það er að minnsta kosti niðurstaða sænskrar rannsóknar.

Skriðdrekar Ísraela halda inn í Gaza

Ísraelar sendu skriðdreka yfir landamærin inn á Gaza ströndina nú síðdegis. Loftárásir á stöðvar Palestínumanna héldu áfram í dag eftir árásir á raforkuver og brýr í nótt. Óttast er að blóðbað kunni að vera í uppsiglingu.

Lík belgískra telpna fundin

Lögreglan í Belgíu hefur nú fundið lík tveggja stúlkna sem leitað hefur verið að í rúmar tvær vikur. Lík stúlknanna fundust með nokkurra metra millibili í háu grasi við járnbrautarteina. Niðurstöður krufningar verða birtar innan skamms en lögreglan telur ekki líklegt að stúlkurnar hafi látist af slysförum.

Pútín hefnir fyrir morð rússneskra sendifulltrúa

Vladimír Pútín, Rússlandsforseti, hefur skipað öryggislögreglu landsins að hafa upp á morðingjum fjögurra Rússa sem rænt var í Írak. Forsetinn hefur, að sögn rússnesku fréttastofunnar Interfax, skipað lögreglumönnunum að myrða þá. Rússunum, sem voru sendifulltrúar í Bagdad, var rænt fyrir mánuði síðan og í þessari viku birti hópur, tengdur al-Qaeda hryðjuverkasamtökunum, myndbandsupptöku á vefnum sem sýnir morð þriggja þeirra. Rússar hafa staðfest að mennirnir fjórir hafi allir verið myrtir.

ESB hraðar viðræðum við Króatíu

Evrópusambandið ákvað í dag að hraða aðildarviðræðum við Króatíu en ekki Tyrkland. Ítarlegar viðræður um samkeppnismál fara nú fram við fulltrúa beggja ríkja en aðeins verður rætt um tollamál við Króata þar sem Evrópuráðið hefur ekki lokið við að bera tollalög Tyrkja saman við lög Sambandsins. Það sem torveldar málið einnig er að stjórnvöld í Ankara hafa ekki viljað leyfa siglingar eða flug frá Kýpur til Tyrklands.

Ísraelsher réðist inn á Gaza

Ísraelsher réðist inn í suðurhluta Gaza-svæðisins í gærkvöldi til að reyna að frelsa ísraelskan hermann sem hefur verið í gíslingu herskárra Palestínumanna frá því á sunnudag. Abbas, forseti Palestínu, segir innrásina stríðsglæp.

Eddie látinn

Hundurinn Moose sem lék Eddie í gamanþáttunum um Frasier er látinn. Moose kom fram í fyrsta þætti Frasier og alla tíð síðan, alls kom hann fram í 192 þáttum. Persóna Eddies í þáttunum var gríðarlega vinsæl og á tímabili fékk Moose fleiri aðdáendabréf en samleikarar hans. Mathilde Halberg, þjálfari Moose, segir hann hafa haft gríðarlega persónutöfra og að hans verði sárt saknað. John Mahoney sem leikur Marty Crane, föður Frasiers og eiganda Eddie, lýsti hundinum eitt sinn sem sönnum fagmanni. Harðduglegum leikara sem eyddi miklum tíma í að læra brögðin sín. Moose dó úr elli, rúmlega sextán ára.

Paroubek víkur úr forsætisráðherraembættinu

Jiri Paroubek, forsætisráðherra Tékklands og leiðtogi vinstrimanna þar í landi, tilkynnti í dag að hann hefði ákveðið að víkja úr embætti í næstu viku. Þar með getur Vaclav Klaus, forseti, útnefnt Mirek Topolanke, leiðtoga hægrimanna, í embætti forsætisráðherra. Flokkur Topolanke vann sigur í þingkosningum í byrjun mánaðarins. Bandalag þriggja hægri flokka hefur þó ekki hreinan meirihluta heldur hundrað þingsæti af tvö hundruð og þarf því að treysta á stuðnings minnst eins þingmanns úr öðrum flokki.

Tamíl-tígrar réðust á tvö skip

Skæruliðar Tamíl-tígra réðust í morgun á tvö skip stjórnarhersins á Sri Lanka. Kveikt var í öðru þeirra. Um sjö hundruð manns hafa fallið í átökum í landinu frá áramótum en vopnahléssamkomulag er enn í gildi. Óttast er að átök síðustu vikna eigi eftir að valda borgarastyrjöld enn á ný.

Lík beggja stúlknanna fundin

Belgíska lögreglan hefur staðfest að lík beggja stúlknanna sem rænt var fyrr í mánuðinum hafi fundist. Stúlkurnar voru stjúpsystur, 7 og 10 ára, en þær hurfu frá borginni Liege 10. júní síðastliðinn. Karlmaður, sem grunaður er um að hafa átt þátt í hvarfi stúlknanna, gaf sig fram við lögreglu fyrir hálfum mánuði. Sá hefur tvívegis verið dæmdur fyrir að misnota börn. Lögregla fann stúlkurnar án upplýsinga frá manninum en hann heldur fram sakleysi sínu.

Þrír handteknir í tengslum við slys í sýningarhöll í Póllandi

Þrír menn hafa verið handteknir vegna mannskæðs slyss í sýningarhöll í Póllandi í janúar. Sextíu og fimm létust og hundrað og fjörutíu slösuðust þegar þak hallarinnar, sem er í bænum Katowice, hrundi undan snjóþunga. Fimm hundruð manns voru í höllinni þegar slysið varð.

Brotthvarf japanskra hermanna frá Írak

Brotthvarf japanskra hermanna frá Írak heldur áfram. Það hófst á sunnudaginn þegar hluti japanska heraflans fór frá Suður-Írak yfir til Kúvæt. Í morgun mátti sjá nokkra vöruflutningabíla flytja búnað yfir landamærin. Sex hundruð japanskir hermenn hafa einungis sinnt hjálparstarfi í borginni Samawah í Suður-Írak síðan 2004. Þeir sinntu vegagerð, byggingu húsa og tóku þátt í að styrkja heilbrigðisþjónustu og hreinsa vatn í borginni. Óttast var um öryggi hermannanna þó friður væri á svæðinu. Enginn japanskur hermaður hefur fallið í Írak.

Óeirðir í Austur-Tímor í nótt

Óeirðir í Dili, höfuðborg Austur-Tímor, í nótt benda til þess að hættuástand þar í landi sé ekki liðið hjá þó Mari Alkatiri, forsætisráðherra, hafi sagt af sér fyrr í vikunni. Hópar ungmenna létu grjóthnullungum rigna yfir búðir þar sem flóttamenn halda til og lögðu eld að fjölmörgum húsum víðsvegar um borgina. Ástralskir friðargæsluliðar hröktu um hundrað óeirðaseggi frá flóttamannabúðunum. Ekki er vitað hvort nokkur særðist.

Ísraelsher ræðst inn á Gaza-svæðið

Ísraelsher hefur tekið sér stöðu við Rafah á suður hluta Gaza-svæðisins. Herinn réðst inn á Gaza seint í gærkvöldi með það fyrir augum að frelsa ungan, ísraelskan hermann sem hefur verið í haldi herskárra Palestínumanna síðan á sunnudaginn.

Stefndi í hörð átök

Palestínumenn bjuggu sig undir innrás Ísraelsmanna á Gaza-svæðið í gærkvöldi og var vegum við landamærin lokað með jarðhleðslum og gaddavír.

Viðurkenna ekki Ísraelsríki

Abdel Rahman Zeidan, ráðherra í palestínsku heimastjórninni, leiðrétti fréttaflutning af samkomulagi milli Hamas-samtakanna og Fatah-hreyfingarinnar í gærkvöldi. BBC hefur eftir honum að í samkomulaginu milli Hamas og Fatah væri ekki minnst einu orði á viðurkenningu á Ísraelsríki. Þetta hefur enginn samþykkt. Þetta var aldrei á borðinu.

Meint fangaflug CIA rannsakað áfram

Evrópuráðsþingið samþykkti í gær að halda skyldi áfram rannsókn á ásökunum um að stjórnvöld í Evrópuríkjum hafi liðsinnt bandarísku leyniþjónustunni við að brjóta mannréttindi á föngum, grunuðum um að tengjast hryðjuverkum.

Hörð gagnrýni á Tony Blair

Charles Clarke, fyrrverandi innanríkisráðherra Tony Blair, gagnrýndi fyrrverandi samherja sinn harkalega í gær og sagði hann hafa misst sjónar á þeim stefnumálum og markmiðum sem Verkamannaflokkurinn hefði áður staðið fyrir. Gagnrýnin kemur í kjölfar slæmrar útreiðar Verkamannaflokksins í skoðanakönnun í vikunni.

Mestur tími fer í að ræða spillingarmál

Mikill órói er nú í Kúveit vegna væntanlegra þingkosninga í landinu. Kosningarnar fara fram þann 29. júní og eru sögulegar að því leyti að nú er konum í fyrsta skipti leyft að kjósa og bjóða sig fram til þings.

Alls ekki stödd á flæðiskeri

Skrifstofa Karls Bretaprins hefur skýrt frá því að tekjur prinsins á síðasta ári hafi numið rúmlega fjórtán milljónum punda, eða jafnvirði um það bil 1.900 milljóna íslenskra króna.

Níu sekir um heiðursmorð

Í kapphlaup um gjafmildi

Rausnarleg gjöf bandaríska auðkýfingsins Warren Buffetts gæti orðið fleiri auðkýfingum fyrirmynd til þess að gefa stóran hluta auðæfa sinna til líknar­mála af ýmsu tagi.

Bjarndýrið fellt í Bæjaralandi

Brúnó, björninn ítalskættaði sem hefur reikað um skóga Bæjaralands undanfarinn mánuð, var skotinn í gær og drapst í kjölfarið, tveggja ára að aldri. Dýraverndunarsinnar eru reiðir vegna málsins og hefur umhverfis­ráðherra Bæjaralands, sem fyrirskipaði drápið, fengið morðhótanir í kjölfarið. Áður höfðu yfirvöld ákveðið að drepa Brúnó ekki, en skiptu um skoðun.

Réttað yfir Naomi Campbell

Ofurfyrirsætan Naomi Campbell mætti fyrir rétt á Manhattan í New York í dag, vegna kæru eins aðstoðarmanna hennar á hendur henni. Fjöldi fjölmiðla beið fyrir utan en réttarhöldin fóru fram fyrir luktum dyrum.

Herferð gegn eyðni í höfuðborg Bandaríkjanna

Borgaryfirvöld í Washington, höfuðborg Bandaríkjanna hafa hrundið af stað herferð til greiningar eyðnismiti til þess að auka vitund almennings um sjúkdóminn. Nú getur fólk kannað hvort það sé smitað, með einföldu munnvatnsprófi sem upplýsir á 20 mínútum hvort fólk sé smitað eða ekki.

Áfram verður réttað yfir Saddam

Saddam fær að sitja áfram undir réttarhöldum út af ódæðisverkum í forsetatíð hans. Hæstiréttur í Bagdad tilkynnti í dag að réttarhöld yfir Saddam Hussein vegna helfarar gegn Kúrdum í Anfal-héraði muni hefjast í ágúst þegar áætlað er að réttarhöldunum vegna Dujail sem nú standa yfir verði lokið.

Rice í heimsókn í Pakistan

Utanríkisráðherra Bandaríkjanna, Condoleeza Rice, kom í dag í heimsókn til Pakistans, en hún mun funda með Musharraf, forseta Pakistans á morgun. Rice sagðist myndu ræða við Musharraf um það hvort hann ætlaði ekki örugglega að standa við loforð sitt um að halda lýðræðislegar kosningar á næsta ári.

Hamas bera til baka fréttir um viðurkenningu Ísraelsríkis

Hamas-liðar segja samkomulag fylkinganna Hamas og Fatah sem tilkynnt var í dag ekki fela í sér nokkra viðurkenningu Hamas-samtakanna á Ísraelsríki. Samkomulagið miðar að því að stöðva innbyrðis átök Palestínumanna af gagnstæðum fylkingum. Samkomulag flokkanna hefur ekki enn verið gert opinbert í heild sinni.

Japansforsætisráðherra heimsækir kónginn í Graceland

Forsætisráðherra Japans, Junichiro Koizumi, kom í dag í opinbera heimsókn til Bandaríkjanna og Kanada. Hann mun ræða við fyrirmenn þar um Norður-Kóreu, öryggismál, efnahagsmál, - og um Elvis Presley.

Evrópuráðið gagnrýnir leynifangelsin

Evrópuráðið gagnrýndi harðlega í ályktun sinni í dag þau lönd sem rekið hafa leynifangelsi eða heimilað fangaflug bandarísku leyniþjónustunnar CIA um lofthelgi sína.