Viðskipti innlent

AGS bannar ríkinu að taka lán í vegagerð

Ríkið mun leggja fram 20 milljónir í hlutafélag sem á að stofna 1. október og síðan á að ráðast í framkvæmdir fyrir 6-7 milljarða á ári næstu ár með lánsfé frá lífeyrissjóðunum. Önnur leið er ekki fær vegna skilyrða Alþjóðagjaldeyrissjóðsins, segir þingmaður.
Ríkið mun leggja fram 20 milljónir í hlutafélag sem á að stofna 1. október og síðan á að ráðast í framkvæmdir fyrir 6-7 milljarða á ári næstu ár með lánsfé frá lífeyrissjóðunum. Önnur leið er ekki fær vegna skilyrða Alþjóðagjaldeyrissjóðsins, segir þingmaður. Mynd/GVA
Vegatollar verða innheimtir til að kosta tvöföldun Suðurlandsvegar, Vesturlandsvegar og Reykjanesbrautar á næstu fjórum árum verði frumvarp sem samgönguráðherra mælti fyrir á Alþingi í fyrrakvöld að lögum.

Lífeyrissjóðirnir munu lána fyrir framkvæmdum sem nema um sex til sjö milljörðum króna á ári næstu fjögur ár. Stofnað verður opinbert hlutafélag til að halda utan um framkvæmdirnar, sem á að ljúka 2014.

Þessi aðferð er nauðsynleg þar sem Alþjóðagjaldeyrissjóðurinn (AGS) fellst ekki á að lán vegna skuldbindinga við þessar framkvæmdir verði færðar í bækur ríkissjóðs, sagði Ásbjörn Óttarsson, þingmaður Sjálfstæðisflokksins, við umræðurnar.

Fyrsta umræða um málið fór fram á ellefta tímanum á mánudagskvöld. Í framsögu Kristjáns L. Möller samgönguráðherra kom fram að í ár væri búið að ákveða vegaframkvæmdir fyrir 11,5 milljarða króna en aðeins fyrir 1,5 milljarða á næsta ári og 500 milljónir árið 2012. Með stofnun opinbers hlutafélags, sem tæki til starfa í október í haust, mætti auka framkvæmdir og örva atvinnulífið.

Þrír þingmenn Sjálfstæðisflokks og einn frá Samfylkingu ræddu málið við ráðherrann. Einar K. Guðfinnsson, Sjálfstæðisflokki, taldi að það hefðu einhvern tímann þótt mikil pólitísk tíðindi að ríkisstjórn með aðild VG, legði fyrir Alþingi frumvarp um að innheimta veggjöld af almenningi.

Anna Margrét Guðjónsdóttir, Samfylkingu, og Ragnheiður Elín Árnadóttir, Sjálfstæðisflokki, gerðu athugasemdir við að reisa ætti „tollmúra umhverfis höfuðborgina en láta aðra landshluta njóta góðs af því að framkvæmdir þar eru kostaðar af ríkissjóði," eins og Anna Margrét komst að orði.

Ragnheiður Elín nefndi að kanna ætti möguleika á að innheimta jafnframt veggjöld í Héðinsfjarðargöngum og Bolungarvíkurgöngum. Framkvæmdum þar er að ljúka á kostnað ríkissjóðs og án ráðgerðra veggjalda.

„Í mínum huga er það grundvallaratriði að gæta jafnræðis í þessum efnum," sagði Anna Margrét, sem þó lýsti stuðningi við frumvarp flokksbróður síns, samgönguráðherrans: „Aðstæður eru nú með með þeim hætti að við þurfum að styðjast við bjargráð sem eru ekki endilega efst á óskalistanum."





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
KVIKA
3,12
25
452.643
SJOVA
2,27
25
193.534
ARION
2,16
46
1.361.687
MAREL
2,04
39
582.450
SIMINN
1,85
14
350.533

Mesta lækkun dagsins


Félag
Br.%
Fjöldi
Velta*
SKEL
-2,34
2
3.406
ICESEA
-1,18
7
13.751
BRIM
0
6
15.074
ORIGO
0
4
13.235
EIM
0
9
215.249
Velkomin á Vísi. Þessi vefur notar vafrakökur. Sjá nánar.