Southgate hefur náð sér af meiðslunum

Gareth Southgate, fyrirliði Middlesbrough, hefur náð sér af nárameiðslum sem hafa haldið honum frá keppni síðan í endaðan október og verður væntanlega í liði Boro sem mætir Fulham á sunnudag.

David Moyes er ekki falur

Forráðamenn Everton hafa brugðist harkalega við getgátum um að David Moyes verði næsti knattspyrnustjóri skoska stórliðsins Glasgow Rangers, en Alex McLeish stjóra Rangers hefur verið gefinn tveggja vikna frestur til að rétta hag skosku meistaranna, ella verði honum vikið úr starfi.

KA mætir Steua Bukarest

Í dag var dregið í 16-liða úrslit Áskorendakeppni Evrópu í handbolta og KA-menn mæta þar liði Steua Bukarest frá Rúmeníu. Fyrri leikur liðanna verður á Akureyri 3. eða 4. desember, en síðari leikurinn viku síðar ytra.

Utah setti vafasamt félagsmet

Þrír leikir voru á dagskrá í NBA deildinni í körfubolta í nótt. Memphis vann auðveldan sigur á Los Angeles Lakers, Utah tapaði heima fyrir New York Knicks og Golden State vann auðveldan sigur á Chicago Bulls.

Tottenham minnir á Ajax

Hollenski miðjumaðurinn Edgar Davids segir að ungt lið Tottenham í dag minni hann á Ajax-liðið sem hann spilaði með í byrjun tíunda áratugarins, en það lið vann hollensku deildina þrjú ár í röð og sigraði í Meistaradeildinni.

Memphis - LA Lakers í beinni

Leikur Memphis Grizzlies og Los Angeles Lakers verður sýndur í beinni útsendingu á NBA TV í nótt og hefst hann um klukkan eitt eftir miðnætti. Í gær var sýndur leikur Sacramento og New York, þar sem Larry Brown og félagar unnu sinn fyrsta sigur í deildinni í vetur.

Clichy meiddist um helgina

Arsenal hefur orðið fyrir því áfalli að missa bakvörðinn Gael Clichy í meiðsli, en talið er að hann sé fótbrotinn eftir að hann meiddist í leik með u-21 árs liði Frakka á White Hart Lane um helgina.

Langar að berjast aftur við Lewis

Þungaviktarhnefaleikarinn Vitali Klitschko, sem nýlega lagði hanskana á hilluna, segir að sér þætti freistandi að snúa aftur í hringinn ef hann fengi tækifæri til að berjast við gamla keppinaut sinn Lennox Lewis.

Borðaði Snickers í morgunmat og hneig niður í lyftu

Mikil skelfing greip um sig í herbúðum Los Angeles Lakers á sunnudagsmorguninn þegar úkraínski miðherjinn Slava Medvedenko féll í yfirlið í lyftu þegar liðið var að yfirgefa hótel og var fluttur á spítala í skyndi.

Nýja liðið heldur Sauber nafninu

Forráðamenn BMW hafa staðfest að nýja liðið þeirra í Formúlu 1, sem hefur keppni á næsta tímabili, muni halda nafni Sauber sem það hét áður en BMW ákvað að skaffa því vélar og heiti því BMW Sauber.

Guðjón vonsvikinn, en refsar leikmönnum ekki

Notts County tapaði á heimavelli fyrir Cheltenham í ensku 3. deildinni um helgina, en þó Guðjón Þórðarson hefði verið mjög vonsvikinn með tapið, ætlar hann ekki að refsa leikmönnum sínum með aukaæfingum eins og hann hefur oft gert þegar hann er ósáttur við frammistöðu þeirra.

Hefur augastað á Arjen Robben

Martin Jol hefur áhuga á að kaupa hollenska vængmanninn Arjen Robben til Tottenham ef hann verður á lausu og í viðtali við hollenska sparksíðu sagði stjórinn að Tottenham ætti nóg af peningum og myndi gera tilboð í Robben ef sú staða kæmi upp. Robben er sagður hafa verið upp á kant við stjóra sinn Jose Mourinho undanfarið.

Góð helgi hjá Jóni og Loga

Jón Arnór Stefánsson og Logi Gunnarsson gerðu ágæta hluti með liðum sínum á Ítalíu og í Þýskalandi um helgina. Jón Arnór skoraði 13 stig fyrir Napoli þegar það lagði Varese með ellefu stiga mun 94-83, en 18 stig Loga Gunnarssonar dugðu ekki fyrir Bayeruth þegar liðið tapaði fyrir Crailsheim með fjórum stigum, 74-70 í þýsku 2. deildinni.

Útilokar ekki að snúa aftur til Englands

Miðjumaðurinn sterki hjá Juventus, Patrick Vieira, segist bera mikla virðingu fyrir Roy Keane hjá Manchester United og útilokar ekki að taka stöðu hans í liðinu í framtíðinni þó hann sé ánægður á toppnum á Ítalíu.

Íhugar að fara frá Liverpool

Pólski markvörðurinn Jerzy Dudek segir að hann vilji fara frá Liverpool ef hann nær ekki að vinna sér sæti í byrjunarliðinu áður en félagaskiptaglugginn á Englandi opnast í janúar.

Gaf 1,2 milljónir dollara í Katrínarsjóðinn

Framherjinn Kevin Garnett hjá Minnesota Timberwolves var heldur betur rausnarlegur fyrir helgina, þegar hann gaf sérstökum styrktarsjóði fórnarlamba fellibylsins Katrínar 1,2 milljónir dollara úr eigin vasa, eða um 70 milljónir íslenskra króna.

Viðurkennir áhuga á að fjárfesta í Liverpool

Bandaríski milljarðamæringurinn Robert Kraft hefur viðurkennt áhuga sinn á að fjárfesta í Liverpool eftir að hafa átt fund með Rick Parry, yfirmanni enska félagsins. Kraft þessi og fjölskylda hans eru eigandi New England Patriots í ameríska fótboltanum.

Ledley King þarf í uppskurð

Varnarmaðurinn Ledley King hjá Tottenham þarf að fara í uppskurð á hné og mun í kjölfarið verða frá keppni í að minnsta kosti sex vikur, þetta kom í ljós eftir að hann frestaði að fara í aðgerð en ákvað að leika með enska landsliðinu gegn Argentínu um helgina.

Loksins sigur hjá New York

Sex leikir voru á dagskrá í NBA deildinni í körfubolta í nótt. Lærisveinar Larry Brown í New York unnu sinn fyrsta leik í deildarkeppninni þegar þeir skelltu Sacramento Kings á útivelli, en Toronto Raptors er enn án sigurs.

Gunnar Heiðar metinn á 2 milljónir punda

Breska dagblaðið Sunday Mirror greindi frá því í gær að Steve Bruce, knattspyrnustjóri enska úrvalsdeildarliðsins Birmimgham, ætli að gera sænska liðinu Halmstad tilboð í Eyjamanninn Gunnar Heiðar Þorvaldsson. Eyjapeyjinn er sagður metinn á 2 mlljónir punda en það jafngildir um 216 milljónum íslenskra króna.

Ólafur Kristjánsson gagnrýnir KSÍ

Ólafur Kristjánsson, fyrrverandi þjálfari Fram, var gagnrýninn á stefnu KSÍ varðandi uppbyggingu yngri landsliða á þjálfararáðstefnu sem KSÍ og KÞÍ stóðu fyrir á laugardag.

Frakkland þarf að bæta sig

Franski knattspyrnusnillingurinn Zinedine Zidane segir að franska landsliðið þurfti að bæta sig mjög mikið til að eiga möguleika á að kljást um heimsmeistaratitilinn í Þýskalandi næsta sumar.

Besti hópur sem ég hef haft

Enski landsliðsþjálfarinn Sven-Göran Eriksson kveðst aldrei hafa haft á jafn sterkum leikmannahópi úr að velja og um þessar mundir og segir að ef hann sleppir við meiðsli treystir hann sér að fara langt með þennan hóp á HM á næsta ári.

Eradze frá keppni í rúma viku

Meiðslin sem markvörður Stjörnunnar, Roland Valur Eradze, varð fyrir í leiknum gegn Val í 16-liða úrslitum SS-bikars karla í síðustu viku reyndust ekki eins alvarleg og talið var í fyrstu en hann mun vera frá í rúma viku.

Atvinnumennska innan fimm ára

Teitur Þórðarson þjálfari KR segir framtíðina á Íslandi aðeins stefna í eitt miðað við aðstöðu og peningana sem komnir eru í íslenska boltann.

Aftur frestun vegna leka

Ekkert varð af leik Þórs og KR í Iceland-Express deildinni í körfubolta sem átti að fara fram í gærkvöld vegna leka á þaki íþróttahallarinnar á Akureyri. Þetta er í annað skipti á stuttum tíma sem að fresta þarf leik norðan heiða vegna leka í íþróttahúsi en í síðustu viku fóru leikmenn Keflavíkur í fýluferð til Egilsstaða þar sem leikurinn gat ekki farið fram vegna vatnlags á gólfi íþróttahússins.

Arsenal vildi mig ekki

Patrick Vieira, leikmaður Juventus á Ítalíu, er harðorður í garð síns gamla félags Arsenal í nýútkominni ævisögu sinni en hann segir að liðið hafi ekki viljað hafa sig áfram.

Úr leik þrátt fyrir sigur

"Ég er stoltur af strákunum og nú kom baráttan sem býr í þessu liði bærlega í ljós," sagði Óskar Bjarni Óskarson þjálfari Vals við Fréttablaðið eftir 24-22 sigur Valsmanna á Skövde í Laugardalshöllinni í gær en Svíarnir unnu samtals með fimm mörkum. Mikil stemmning var í Höllinni en bæði Valsmenn og Svíar fjölmenntu á pallana og skemmtu sér konunglega.

Njarðvík með fullt hús stiga

Fimm leikir fóru fram í Iceland Express deild karla í körfubolta í kvöld. Njarðvíkingar eru enn með fullt hús stiga eftir 6 leiki með 11 stiga útisigri á ÍR, 70-81. Í Stykkishólmi fóru heimamenn í Snæfelli hamförum og völtuðu yfir Fjölni með 36 stiga sigri, 130-94. Í Hverargerði steinlágu heimamenn í Hamri/Selfossi fyrir Skallagrími, 75-109 og í Grindavík unnu heimamenn 108-70 sigur á Hetti.

Arsenal hafði ekki nógu mikinn áhuga

Patrick Vieira miðjumaður Juventus á Ítalíu segir í nýútkominni ævisögu sinni að áhugaleysi Arsenal á að hafa sig áfram, hafi verið þess valdandi að hann yfirgaf félagið í sumar. Vieira segir að það hafi verið orð varastjórnarformanns Arsenal, David Dean, sem hröktu hann til Ítalíu.

Haukar úr leik í Evrópu

Haukar eru úr leik í Evrópukeppninni í handbolta í ár. Þeim mistókst að ná þriðja sæti síns riðils þegar þeir töpuðu fyrir ítalska liðinu Torggler Meran, 31-27 í Ítalíu í Meistaradeildinni í kvöld. Staðan í hálfleik var 17-12 fyrir ítalska liðið.

Valsmenn úr leik

Valsmenn er úr leik í EHF-keppni karla í handbolta þrátt fyrir tveggja marka sigur á sænska liðið Skövde í Laugardalshöll í dag, 24-22. Þetta var síðari leikur liðanna en Svíarnir unnu fyrri leikinn ytra um síðustu helgi 35-28. Baldvin Þorsteinsson og Mohamed Loutoufi voru markahæstir Valsmanna í dag með 5 mörk hvor. Pálmar Pétursson markvörður Vals varði 19 skot í leiknum í dag.

Slakið á væntingunum!

Frank Lampard, miðjumaður Chelsea og enska landsliðsins í fótbolta er jarðbundinn þrátt fyrir glæstan 2-3 sigur Englendinga á Argentínu í vináttulandsleik í gær. Hann sendir Bretum skýr skilaboð í dag en þar í landi á almenningur til að líta frekar stórt á landsliðið sitt á stundum.

Leik Þórs og KR frestað vegna leka

Leik Þórs Akureyri og KR sem fram átti að fara í kvöld í Iceland Express deild karla í körfubolta hefur verið frestað vegna leka í íþróttahúsinu á Akureyri. Leikurinn hefur verið settur á á þriðjudagskvöldið 15. nóvember nk. kl. 19:15. Fimm leikir eru á dagskrá deildarinnar í kvöld og hefjast þeir allir kl. 19:15.

Birgir Leifur 3 höggum frá því að komast áfram

Birgir Leifur Hafþórsson hafnaði í 98.-106. sæti og er úr leik á lokaúrtökumótinu fyrir Evrópumótaröðina í golfi sem lauk á San Roque vellinum á Spáni nú undir kvöldið. Birgir lauk keppni um hádegisbil á samtals 12 yfir pari en aðeins munaði þó þremur höggum frá því að hann kæmist áfram.

Molde sigraði Moss

Molde sigraði Moss 3-2 á útivelli í fyrri leik liðanna um sæti í norsku úrvalsdeildinni í fótbolta í dag. Síðari leikur liðanna fer fram á heimavelli Molde um næstu helgi. Molde varð í þriðja neðsta sæti úrvalsdeildarinnar sem lauk fyrir hálfum mánuði og Moss í 3. sæti 1. deildar.

Spánn, Tékkland og Sviss í góðum málum

Spánn, Tékkland og Sviss eru í góðum málum eftir fyrri viðureignir sínar í umspili um laus sæti á HM2006 í knattspyrnu. Landsliðsþjálfari Tyrkja, Fatih Terim, mætti ekki á fréttamannafundinn eftir leikinn gegn Sviss en hann heldur því fram að öryggisvörður hafi meinað honum aðgöngu að fundarsalnum.

Leitar að varamanni fyrir Ívar

Steve Coppell, knattspyrnustjóri Reading sem Brynjar Björn Gunnarsson og Ívar Ingimarsson leika með hyggst leita að varaskífu fyrir Ívar nú á meðan hlé stendur yfir í deildum vegna landsleikja. Á stuðningsmannasíðu Reading segir að Coppell hafi augastað á Sam Sodje hjá Brentford sem á að vera til staðar ef Ívar eða félagi hans í miðverðinum, Ibrahima Sonko, skyldu meiðast.

Ísland mætir Hollandi í apríl

Íslenska kvennalandsliðið í knattspyrnu mun leika vináttulandsleik gegn Hollendingum ytra 12. apríl næstkomandi. Leikurinn er liður í undirbúningi fyrir leiki í undankeppni HM kvenna í maí og júní 2006.

Eiður og Duff á klakanum

Vísir.is hefur óstaðfestar heimildir fyrir því að Eiður Smári Guðjohnsen og Damien Duff, leikmenn Chelsea, séu nú staddir í Reykjavík. Ekki er vitað hvort fleiri leikmenn Chelsea séu staddir á landinu með Eiði en þeir félagar munu samkvæmt okkar heimildum hafa í hyggju að vera viðstaddir Galafrumsýningu í kvöld á nýju Eli Roth og Quentin Tarantino kvikmyndinni Hostel, sem Íslendingurinn Eyþór Guðjónsson leikur aðalhlutverkið í.

KR-FH í 1. umferð

Íslandsmeistarar FH heimsækja KR í Frostaskjól í 1. umferð Landsbankadeildar karla næsta sumar en dregið var í töfluröð landsleilda 2006 nú í dag. Í 1. umferð Landsbankadeildar kvenna hefja Blikastúlkur titilvörn sína með því að leika við KR.

Svíar og S-Kórea skildu jöfn

Svíar náðu jafntefli gegn Suður Kóreu, 2-2 í vináttulandsleik í knattspyrnu sem fram fór í Kóreu í morgun. Svíar léku án fyrirliðans Olaf Melberg og sóknartríósins Henrik Larsson, Freddie Ljundberg og Zlatan Ibrahimovich.

Búningsherbergi Man Utd hlerað

Komið hefur í ljós að hlerunartæki var komið fyrir í búningsherbergi Manchester United á heimavelli liðsins, Old Trafford fyrir leik liðsins gegn Chelsea um síðustu helgi. Félagið hefur hafið innanhússrannsókn á því hvernig hlerunartækinu var komið fyrir og munu kalla til lögreglu ef þörf krefur.

Fjölmiðlamenn ráku þjálfara

Ólafur Jóhannesson þjálfari Íslandsmeistara FH í knattspyrnu karla segir að ýmsir blaðamenn hafi óbeint með skrifum sínum rekið knattspyrnuþjálfara úr störfum sínum í Landsbankadeildinni í sumar. Þetta sagði Ólafur í ræðu á formannafundi allra aðildarfélaga KSÍ sem fram fór á Hótel Nordica í morgun.

Dregið í töfluraðir í dag

Í dag kl. 13 verður dregið í töfluröð fyrir landsdeildir 2006 í fótbolta en þá skýrist hvaða félög mætast í einstökum umferðum viðkomandi móts. Drátturinn er fyrir Landsbankadeild karla, Landsbankadeild kvenna, 1. deild karla og 2. deild karla og fer hann fram á Hótel Nordica. Niðurstöður dráttarins ættu að liggja fyrir um miðjan daginn í dag.