Setning Iceland Airwaves: For­setinn og ljúfir tónar á Grund

Opnunarathöfn Iceland Airwaves hófst klukkan 10 á Grund í morgun og stendur enn yfir. Fjöldi góðra gesta mætti á opnunarathöfnina: forsetahjónin, íbúar á Grund, leikskólabörn úr hverfinu, bransafólk og aðrir tónlistaráhugamenn.

Hægt er að horfa á útsendinguna í heild sinni í spilaranum að neðan. 

Ísleifur Þórhallsson, framkvæmdastjóri Senu og skipuleggjandi Iceland Airwaves, flutti fyrst tölu, þakkaði Grund fyrir móttökurnar og gestum fyrir mætinguna og fór stuttlega yfir dagskrána. Halla Tómasdóttir, forseti Íslands, setti tónlistarhátíðina síðan formlega af stað og flutti tölu um mikilvægi tónlistar og tónlistarhátíðarinnar.

„Ég er efins um að nokkur tónlistarhátíð hefjist með þeim hætti sem hér er gert, þar sem yngstu börnin til elstu borgara okkar og fjöldi erlendra gesta koma saman þvert á kynslóðir og líklega tónlistarsmekk og njóta tónlistar saman. Ég held að tónlist hafi einstaka töfra og ég finn það í mínu starfi hvað tónlistaratburðir gera mikið fyrir mig í mínu starfi. Stundum er starfið strembið en svo fer maður á tónleika og tónlistin hefur einhverja einstaka töfra,“ sagði Halla.

Tónlistin fái fólk til að kjarna sig og fátt stilli samhljómin og samkenndina jafnmikið og tónlistin geri. Þess vegna sé fallegt að hátíðin hefjist á Grund þar sem fólk leggi frá sér símana og njóti tónlistarinnar.

„Pétur er búinn að gefa mér nýtt orð í hvert skipti sem ég kem hingað. Eitt orð er að við séum orðin strokufangar af því við strjúkum símunum okkar út í eitt og erum sjaldan til staðar, sérstaklega við á okkar aldri,“ sagði hún og vísaði þar til Péturs Þorsteinssonar.

„Svo kenndi Pétur mér annað orð: Sundurfélagsmiðlarnir. Það eru samfélagsmiðlarnir sem draga okkar frekar í sundur en saman. En þegar við hlustum á tónlist erum við ekki strokufangar og erum ekki á sundurfélagsmiðlum,“ bætti hún við.

Hún sagðist vona að Iceland Airwaves myndi halda í þessa góðu hefð sem lengst.

„Ég er líka ótrúlega stolt af því að Ísland, þrátt fyrir að vera lítið land, á ótrúlega mörg stór tónlistarnöfn sem flytja hróður okkar víða. Þau gleðja okkur hér heima en gera okkur líka stór úti í heimi,“ sagði hún síðan.

„Ég hóf minn fyrsta búskap eftir að ég flutti að heiman hérna á Brávallagötu 26 þannig mér finnst ég líka komin heim þegar ég kem á Grund,“ sagði hún að lokum áður en þau Pétur brugðu á skemmtilegan samkvæmisleik með gestum.

Tónlistarkonan Rakel tók síðan nokkur lög fyrir gesti, söng og spilaði á gítar áður en strákarnir í Lóni tóku við undir styrkri forystu Valdimars Guðmundssonar.

Tónlistarhátíðin Iceland Airwaves hefur verið haldin árlega síðan 1999 og er einn stærsti menningarviðburður hér á landi ár hvert. Hátíðin fer alla jafna fram þriðju helgina í október en stendur í ár yfir dagana 4. til 8. nóvember. 

Iceland Airwaves hefst á tónleikum Shygirl með upphitun Joey Christ og Alösku1867 í Tjarnarsalnum í Ráðhúsi Reykjavíkur í kvöld. Aðaldagskrá hátíðarinnar stendur yfir frá fimmtudegi til laugardags og svo lýkur henni á tónleikum The Streets í Eldborgarsalnum í Hörpu á sunnudag.