ÍBV samdi við banda­rískan her­mann

Leikmennirnir heita Gary Phillips og Parkman Cook. Sagan á bak við komu þeirra til Eyja er skemmtileg.

„ÍBV spilaði við þróunarlið Bandaríkjanna í Hollandi í sumar. Ekki beint spennandi leikur enda völtuðum við yfir þá með 20 plús mörkum,“ segir Vilmar Þór Bjarnason, framkvæmdastjóri handknattleiksdeildar ÍBV.

Spilaði handbolta í hernum

Erlingur B. Richardsson, þjálfari ÍBV, er kunnugur landsliðsþjálfara Bandaríkjamanna, Mark Ortega. Þeir ræddu málin ytra og niðurstaðan var sú að Bandaríkjamennirnir koma til Íslands í dag.

„Bandaríkjamenn eru að byggja upp handboltann hjá sér fyrir næstu Ólympíuleika og voru með þróunarlið sitt á flakki um Evrópu. Þetta var ekki landsliðið þeirra heldur efnilegir leikmenn sem er verið að reyna að byggja upp. Gary Phillips var leikmaður sem vakti athygli,“ bætir Vilmar við.

Phillips, 23 ára, er örvhent skytta sem á sér skemmtilega sögu. Hann er hermaður sem gekk í West Point herskólann og spilaði meira að segja handbolta þar. Hann var leikstjórnandi í amerískum fótbolta en ákvað svo að prófa eitthvað nýtt. Hann er mikill íþróttamaður og verður áhugavert að sjá hvernig hann mun þróast sem handboltamaður.

„Það er mjög spennandi að fá þessa stráka til okkar og sjá hvernig þeir munu pluma sig hjá okkur,“ segir Vilmar spenntur.

Óljóst er hvenær þeir félagar munu spila sinn fyrsta leik fyrir ÍBV enda eru þeir ekki orðnir löglegir sem leikmenn félagsins og á eftir að ganga frá einhverjum pappírum áður en þeir fá að skarta búningi Bandalagsins.