Kín­verskar stór­stjörnur í haldi yfir­valda vegna rann­sóknar um spillingu

Í apríl var Zhang Jun, forseti kínverska badmintonsambandsins, undir rannsókn fyrir bæði spillingu og fjárdrátt frá kínverska badmintonsambandinu. Kína tekur svona ásökunum alvarlega og er Zhang Jun búinn að vera í haldi yfirvalda síðan. Zhang Jun vann tvenn gullverðlaun á Ólympíuleikum þegar hann var leikmaður og var fyrir rannsóknina mikils metinn innan Kína.

Nú hefur málið þróast enn meira því á mánudaginn var Xia Xuanze, varaforseti kínverska badmintonsambandsins og landsliðsþjálfari í einliðaleik, einnig rannsakaður og er í haldi yfirvalda í Kína.

Xia Xuanze er 47 ára gamall og er af mörgum talinn einn besti kínverski badmintonmaður allra tíma. Hann varð heimsmeistari árið 2003 og var einnig lykilleikmaður þegar Kína varð heimsmeistari í liðakeppni.

Báðir leikmennirnir voru gríðarlega mikils metnir innan Kína og því er gert ráð fyrir að brot þeirra séu mjög alvarleg fyrst þeir voru teknir af yfirvöldum. Kína hefur ekki gefið upp opinberar upplýsingar um málið en það uppgötvaðist fyrst þegar Zhang Jun var ekki viðstaddur þegar heimsmeistaramót landsliða fór fram í apríl.

Þetta mál hefur einnig haft áhrif á kínverska leikmenn en Shi Yuqi, efsti leikmaður heimslistans, hefur verið skugginn af sjálfum sér á meðan Xia Xuanze hefur ekki verið með honum á hliðarlínunni. Shi Yuqi var mjög náinn þjálfara sínum og virðist vera nokkuð týndur ekki með þjálfarann sér við hlið. Sem dæmi tapaði Shi Yuqi í fyrstu umferð heimsmeistaramótsins sem fór fram í sumar.

Fleiri upplýsingar eiga eftir að birtast í málinu en það er enn á frumstigi. Kínversk yfirvöld reyna eins og þau geta að halda málinu frá almenningi svo ekki er meira vitað um málið að svo stöddu.