Vals­menn slógu í klárinn undir lokin

Arnór Snær Óskarsson, nýr fyrirliði Vals, skoraði níu mörk fyrir Íslandsmeistarana sem voru með frumkvæðið í fyrri hálfleik. Valsmenn náðu þá mest fimm marka forskoti en í hálfleik munaði aðeins einu marki á liðunum, 15-14.

Framan af seinni hálfleik sóttu Haukar hart að Val og náðu forystunni, 20-21. Þá stigu Valsmenn aftur á bensíngjöfina, skoruðu þrjú mörk í röð og endurheimtu forskotið, 23-21.

Haukar jöfnuðu í 23-23 en þá fóru Valsmenn á flug og unnu lokakafla leiksins, 8-3, og leikinn með fimm marka mun, 31-26.

Gunnar Róbertsson og Allan Norðberg skoruðu fimm mörk hvor fyrir Val og Jens Sigurðarson varði fimmtán skot í marki Íslandsmeistaranna (38 prósent).

Freyr Aronsson skoraði átta mörk fyrir Hauka og Grétar Ari Guðjónsson varði þrettán skot (32 prósent).

Haukum var spáð sigri í Olís-deildinni í árlegri spá fyrirliða, þjálfara og forráðamanna liðanna í deildinni sem var kynnt í dag. Val var spáð 2. sætinu.

Á fimmtudaginn kemur sækir Valur Selfoss heim í 1. umferð Olís-deildarinnar. Sunnudaginn 6. september fá Haukar ÍBV í heimsókn á Ásvelli.