Líkindi með Grand Theft Auto og Red Dead Redemption

GTA6 hefur verið í framleiðslu í meira en áratug en síðasti leikurinn í seríunni vinsælu kom út árið 2013. Beðið er eftir leiknum af mikilli eftirvæntingu en GTA 5 naut gífurlegra vinsælda á þremur kynslóðum leikjatölva og PC-tölvum í gegnum árin.

Fyrr í sumar sögðu forsvarsmenn útgáfufyrirtækisins Take-Two Interactive að GTA 6 hefði selst með fordæmalausum hætti í forsölu.

Sjá einnig: Einkaréttur Netflix á stiklu GTA 6 vekur athygli

Nýi leikurinn gerist í Vice City, sem er GTA-útgáfa af Miami. Sú borg var síðast heimsótt í leiknum GTA: Vice City, sem kom út árið 2002.

Eins og í GTA 5 verður hægt að spila fleiri en eina persónu en leikurinn mun fjalla um þau Jason og Luciu. Leikurinn á að koma út þann 19. nóvember.

Nýja myndbandið hefst á því að þau Jason og Lucia eru að sækja eitthvað fyrir mann sem kallast Boobie. Sjá má Jason klappa hundi og virðist hann fá einhver stig fyrir það, sem gefur til kynna að leikurinn sé með einhvers konar heiðurskerfi, eins og Red Dead Redemption 2, þar sem maður fékk jákvæð stig fyrir að koma vel fram við fólk og dýr og neikvæð stig fyrir að skjóta fólk.

Þetta væri ekki GTA-leikur ef allt gengi vel og Jason og Lucia þurfa fljótt að berjast fyrir lífum sínum.

Vopnakerfi leiksins virðist líka vera svipað og í RDR2 þar sem Jason sést skipta milli skammbyssu og haglabyssu. Þá sést Jason einu sinni hægja á tímanum, eins og í RDR2 til að ná nákvæmu skoti.

Það er fjölmargt annað sem sjá má í myndbandinu, eins og það hvernig bílum er stolið, rán, umferðina, slagsmál, fleiri bardaga, köfun, lyftingar og alls konar.