Fleiri and­vígir hval­veiðum en fylgjandi

Spurt var hvort að fólk væri hlynnt eða andvígt veiðum á langreyðum. Í niðurstöðum má sjá töluverðan kynjamun þar sem konur eru mun andvígari veiðunum en karlar en 44 prósent karla eru hlynnt veiðunum en aðeins 21 prósent kvenna. 

Þá eru eldri karlar líklegri til að styðja veiðarnar en þeir sem yngri eru. Almennt er yngra fólk andvígara veiðunum en það eldra. Um 21 prósent yngsta aldurshópsins er hlynnt veiðunum en 45 prósent þeirra sem eru í elsta aldurshópnum.

Ef litið er til stjórnmálaskoðana má sjá í niðurstöðum að þau eru hlynntust veiðunum sem kjósa Miðflokkinn, 43 prósent, og Sjálfstæðisflokkinn, 24 prósent. Þau sem mest eru andvíg þeim eru líklegust til að kjósa Samfylkinguna, Pírata, Sósíalistaflokkinn og Vinstri græn.

Frá árinu 2022 hefur hlutfall þeirra sem andvíg eru veiðum verið hærra en hlutfall þeirra sem hlynnt eru veiðum. Þá voru 35 prósent andvíg en 33 prósent hlynnt. Árið eftir, 2023, voru 42 prósent andvíg og 29 prósent hlynnt. Maskína mældi svo viðhorf þrisvar árið 2024 og var þá hlutfall þeirra sem voru andvíg 42 prósent í upphafi árs en 39 prósent við lok árs. Hlutfall þeirra sem voru hlynnt var 33 prósent í upphafi árs og 36 prósent við lok árs. Næsta mæling er svo sú nýjasta sem fór fram í lok apríl til upphafs maí á þessu ári. Alls svöruðu um 1018 könnuninni samkvæmt Maskínu.

Mótmæli síðustu daga

Hvalveiðum Hvals hf. hefur verið mótmælt síðustu daga. Hólmgeir Harðarson kom sér fyrir í tunnu á masti annars skipsins áður en þau héldu út í síðustu viku og svo voru haldin mótmæli á Austurvelli um helgina. 

Þá hafa samtök  í nafni Paul Watson gefið út að skip á þeirra vegum sé er á siglingu sinni til landsins og að framundan sé Operation 86 eða aðgerð 86 og og er þar vísað til þess atburðar þegar aðgerðasinnar sökktu tveimur hvalveiðiskipum árið 1986. Nú sé á dagskrá að endurtaka leikinn og binda enda á hvalveiðar Íslendinga. Tónlistarmaðurinn Moby hefur nú lagt baráttu þeirra lið. 

Fyrstu langreyðarnar, sem veiðst hafa á Íslandsmiðum síðan 2023, voru dregnar á land snemma fyrr í vikunni. Ljósmyndari Vísis, Vilhelm Gunnarsson, myndaði þegar þær voru dregnar á land.