„Ég er búin að bíða eftir þessu lengi“

Perla byrjar tímabilið hér heima á Reykjanesmótinu og er efst eftir fyrsta hring í dag, við krefjandi aðstæður vegna veðurs, jöfn heimakonunni Fjólu Margréti Viðarsdóttur á +4 höggum.

Perla er komin heim eftir fyrsta veturinn sinn í bandaríska háskólagolfinu, þar sem hún spilar með Louisiana State háskólanum líkt og Gunnlaugur Árni Sveinsson.

„Það er alveg geggjað að geta æft og spilað allt árið og stundað nám í leiðinni. Það er alveg geggjað,“ segir Perla sem fetar í fótspor bróður síns, ríkjandi Íslandsmeistarans Dagbjarts Sigurbrandssonar, sem nú hefur lokið sínu námi í Bandaríkjunum.

Í sumar verður í nógu að snúast hjá þessari efnilegu Grafarvogskonu sem meðal annars á það á ferilskránni að hafa orðið Evrópumeistari 16 ára og yngri, spilað í Junior Solheim bikarnum, og orðið sú næstyngsta frá upphafi til að verða Íslandsmeistari, 15 ára gömul árið 2022.

„Ég er rosalega spennt fyrir Íslandsmótinu í sumar, þar sem það verður í Korpunni, á mínum heimavelli. Ég er búin að búa í Staðahverfinu allt mitt líf þannig að ég er búin að bíða eftir þessu lengi,“ segir Perla. Hún mun einnig hafa nóg fyrir stafni á mótum erlendis.

„Ég verð á EM einstaklinga og EM landsliða, svo mögulega Opna breska og vonandi einu atvinnumannamóti, ef ég fæ boð,“ segir Perla létt í bragði en viðtalið við hana má sjá hér að ofan.