„Við erum alltaf að gefa í“

Ólafur Björn Loftsson, landsliðsþjálfari og afreksstjóri GSÍ, segir mikinn meðbyr með golfhreyfingunni í ár og spennandi sumar að hefjast. Sjö mót eru á GSÍ-mótaröðinni hér heima og þar er hápunkturinn að sjálfsögðu sjálft Íslandsmótið á Korpúlfsstöðum í ágúst.

„Það verður hart barist í sumar. Svo er nóg um að vera hjá okkar kylfingum erlendis – okkar fremstu kylfingar á sterkustu áhugamannamótum heims – og svo höfum við sjaldan verið með eins breiðan hóp atvinnukylfinga að spila úti um alla Evrópu í sumar,“ segir Ólafur Björn sem ræddi við Sýn á kynningarfundi GSÍ í vikunni. Hann verður með augun víða í sumar enda margir kylfingar að gera spennandi hluti:

„Það er mikill meðbyr með golfhreyfingunni í ár, margt jákvætt að gerast. Dagbjartur [Sigurbrandsson] var að komast í lokaúrtökumótið fyrir US Open svo þeir Gunnlaugur Árni [Sveinsson] verða þar annað árið í röð.

Gunnlaugur Árni náði hæst í 8. sæti á heimslista áhugamanna og er að spila á mjög virtum mótum. Var valinn í Arnold Palmer Cup, sem er sterkasta áhugamannamót heims, annað árið í röð og mun taka þátt í öllum þessum stærstu verkefnum. Það verður mikill spenningur að fylgjast með og styðja okkar flotta afreksfólk,“ sagði Ólafur.

Styttist í næsta inn á risamót

Þrír íslenskir kylfingar, þau Ólafía Þórunn Kristinsdóttir, Valdís Þóra Jónsdóttir og Haraldur Franklín Magnús, hafa afrekað það að spila á risamóti. Telur Ólafur að það bætist brátt í þann hóp?

„Það styttist í það. Við erum á mjög góðri leið og alla vega að taka þátt. Hulda Clara [Gestsdóttir] spreytti sig í vikunni og við leggjum mikið á okkur til að koma kylfingunum okkar á stærsta sviðið, þar með talið á risamótin,“ sagði Ólafur. Allt kapp er lagt á að fremstu kylfingar landsins geti lagt allt í sölurnar til að ná árangri:

„Stuðningurinn er alltaf að aukast. Þetta hefur verið heilsárssport í svolítinn tíma en við erum alltaf að reyna að leggja meira á okkur til að styðja við krakkana. Til dæmis varðandi landsliðshópinn þá voru farnar þrjár tíu daga ferðir í vetur [til Portúgals og Spánar]. Við erum alltaf að gefa í. Svo eru okkar bestu kylfingar að fara til Bandaríkjanna í háskólagolfið, og spila þar yfir allt árið á stærsta sviðinu í áhugamennskunni. Við erum alltaf að taka skref í rétta átt,“ segir Ólafur.

Fremstu kylfingar landsins hafa auk þess verið að komast inn í sterk háskólalið í Bandaríkjunum og getað sinnt sinni íþrótt þar eins og atvinnumenn:

„Þetta er langbesta leiðin fyrir okkur til að feta. Við leggjum því áherslu á að undirbúa okkar kylfinga sem best fyrir háskólagolfið og í gegnum þetta erfiða ferli við að komast út í skóla, því ef við náum að koma krökkunum í stærstu skólana þá aukast líkur þeirra töluvert á að komast á PGA- og LPGA-mótaröðina, sem er okkar markmið.“