Nýr for­maður Breiðabliks: „Að­staða margra deilda er sprungin“

Pétur var sjálfkjörinn og tekur við af Ásgeiri Baldurs sem gegnt hafði formennsku félagsins frá árinu 2022. Pétur hefur setið í aðalstjórn Breiðabliks frá árinu 2022 og var áður formaður körfuknattleiksdeildar Breiðabliks árin 2005-08.

Pétur starfar sem sviðsstjóri getraunasviðs hjá Íslenskum Getraunum en var áður framkvæmdastjóri Körfuknattleikssambands Íslands um árabil.

Reynsla Péturs úr stjórnmálum ætti að nýtast vel miðað við markmið hans sem formaður Breiðabliks.

Pétur sagði nauðsynlegt að huga að uppbyggingu mannvirkja en hann var einmitt í byggingarnefnd Kópavogs, fyrst sem formaður en síðar sem almennur nefndarmaður sem bæjarfulltrúi Samfylkingarinnar í Kópavogi. Hann er ekki á lista Samfylkingarinnar í komandi sveitastjórnarkosningum í Kópavogi.

„Breiðablik hefur vaxið hratt á undanförnum árum og nú er svo komið að aðstaða margra deilda er sprungin. Nauðsynlegt er að huga að uppbyggingu mannvirkja til að mæta áframhaldandi vexti félagsins. Ég hlakka til að taka þátt í þeirri mikilvægu uppbyggingu í góðu samstarfi við Kópavogsbæ og allar deildir félagsins,“ segir Pétur í tilkynningu Breiðabliks.

Ásgeir Baldurs, sem gegnt hefur formennsku félagsins frá árinu 2022, gaf ekki kost á sér til áframhaldandi setu.

Á fundinum var Ásgeir sæmdur gullmerki ÍSÍ og UMSK fyrir störf sín í þágu félagsins og íþróttahreyfingarinnar.

Við þessi tímamót sagði Ásgeir Baldurs:

„Ég kveð formannsembættið í Breiðablik með þakklæti og stolti. Það hefur verið mér mikill heiður að fá að leiða þetta stórkostlega félag og vinna með frábæru fólki. Breiðablik er stærsta og öflugasta félag landsins og ástæðan fyrir því er fólkið sem stendur að félaginu — starfsfólk, sjálfboðaliðar og iðkendur.

Ég óska nýkjörnum formanni, Pétri Hrafni, innilega til hamingju og er sannfærður um að félagið muni halda áfram að vaxa og dafna undir hans stjórn og Tönju Tómasdóttur framkvæmdastjóra. Áfram Breiðablik!“