Magnús í sjúkra­bíl af Hlíðar­enda

Valsmenn eru því einum sigri frá Íslandsmeistaratitlinum eftir tveggja marka sigur kvöldsins, 32-30. Staðan í einvíginu 2-1 fyrir Val, en liðin mætast næst á mánudaginn í Kaplakrika.

Auðvitað algjört slys

Það skyggði þó á gleði Valsmanna að Magnús Óli Magnússon skyldi meiðast illa í leiknum. Sjúkrabíll kom og sótti hann eftir að hann var borinn af velli.

„Þeir bara skullu saman, auðvitað bara algjört slys og þetta var höfuðhögg. Ég hélt að samkvæmt reglunum þá ætti að stoppa leikinn strax en það allavegana fannst dómurunum ekki. Magnús fór í sjúkrabíl hérna áðan þannig að ég veit svo sem ekkert meira stöðuna á því,“ sagði Ágúst.

Varðandi leikinn sjálfan þá var Ágúst ánægður með sigur í frábærum handboltaleik.

„Ég hefði viljað geta keyrt aðeins meira á þá, en við vorum með góðan varnarleik og náðum að brjóta vel á þeim og Björgvin góður fyrir aftan. Það var kannski það sem skóp sigurinn,“ sagði Ágúst.

„Ég verð nú að segja það að mér fannst FH-ingarnir frábærir í þessum leik og þetta var frábær handboltaleikur. Hann hefði getað farið í báðar áttir og endað beggja megin, en sem betur fer endaði þetta hjá okkur.“

Þetta er það sem við viljum standa fyrir

Valsmenn lentu nokkru sinnum tveimur mörkum undir og var oft á tíðum mikill meðbyr með FH á þeim köflum. En hvers vegna náðu leikmenn Ágústs alltaf að snúa leiknum aftur?

„Menn bara misstu ekkert trúna. Við vorum líka tveimur þrem yfir og þetta sveiflaðist aðeins. Mér fannst við bara ná að stilla okkur vel af. Við fengum bara framlag frá mörgum leikmönnum, þetta var bara ekta liðsheildar sigur og það er eitthvað sem við viljum standa fyrir. Við erum að dreifa mörkunum vel og fá framlag frá öllum beggja megin á vellinum. Þá erum við sterkir og erfitt að vinna okkur þegar staðan er þannig á liðinu.“

Næsti leikur í einvíginu er á mánudaginn og segir Ágúst undirbúninginn fyrir þann leik ekkert frábrugðin þeim undirbúningi sem verið hefur, þrátt fyrir að titill sé undir.

„Það er bara það sama og fyrir alla þessa leiki. Við mættum síðast í Kaplakrika og vorum ekki tilbúnir og að mæta í Kaplakrika er ekkert einfalt. Þeir eru gríðarlega sterkir þar. Núna tökum við bara frídag á morgun og hvílum okkur vel. Í svona seríum getur allt gerst.“