„Höfum beðið eftir þessu alla úr­slita­keppnina“

„Við héldum bara áfram að berjast og loksins small þetta saman. Við hittum úr nokkrum skotum og náðum tíu, fimmtán og svo tuttugu stiga forskoti,“ sagði Semple í samtali við Andra Má Eggertsson eftir leikinn.

Grindvíkingar byrjuðu leikinn af krafti og skoruðu fyrstu sex stig hans.

„Við vorum tilbúnir, vildum byrja mjög vel og breyta ýmsu, vera ákveðnari og það skilaði sér.“

Semple segir að Grindvíkingar hafi verið svekktir eftir síðasta leik sem þeir töpuðu, 79-72.

„Þeir eru með gott lið. Það er ástæða fyrir því að þeir eru í undanúrslitum. Þetta var jafn leikur og mér fannst vörnin bara þurfa að vera betri. Þeir skoruðu 67 stig. Við tökum því,“ sagði Semple.

Eftir að Igor Maric minnkaði muninn í 68-60 tóku Grindvíkingar leikhlé og eftir það skoruðu þeir fjórtán stig í röð án þess að Valsmenn næðu að svara fyrir sig.

„Við höfum beðið eftir því að komast á skrið alla úrslitakeppnina og við gerðum það loks í þessum leik. Allir lögðu sig mikið fram og liðið náði vel saman,“ sagði Semple sem var mátulega sáttur með eigin frammistöðu í kvöld.

„Hún var ágæt. Ég klikkaði á nokkrum skotum í byrjun. Þeir þétta teiginn og við setjum allir boltann út og verðum að setja þessi skot niður fullir sjálfstrausts,“ sagði Semple að endingu.