„Ein­vígið fer ekki á einum manni“

Björgvin Páll segir Vals liðið hafa farið leikinn á orkunni og væri nóg á tanknum hjá liðinu.

„Við stillum okkur aðeins af varnarlega, en svo erum við líka með ansi mikla orku. Við getum spilað fjóra leiki í viðbót hérna í kvöld. Við erum bara í geggjuðu standi og svo kveikti Strætóskýlið í okkur, okkar stuðningsmannasveit. Ég er þakklátur fyrir það. Orkan í húsinu var mikil og góð og við tókum hana með okkur.“

Björgvin Páll gaf lítið fyrir að um vendipunkt hafi verið um að ræða þegar Jóni Bjarna Ólafssyni, lykilmanni í liði FH, var vikið af velli með rautt spjald í upphafi síðari hálfleiks. Í kjölfar þess brenndi FH af tveimur dauðafærum á meðan Valur gekk á lagið og myndaði sér góða forystu með auðveldum mörkum sem skiluðu sér á endanum í því að sigur hafðist fyrir Hlíðarendapilta.

„Það má tala um vendipunkt þar og þið munuð örugglega tala um vendipunkt um þetta rauða spjald í viðtölum, en hann klúðraði ekki þessum tveimur skotum í framhaldinu. Einvígið fer ekki á einum manni, ég ætla að vona ekki allavega.“

„Þeir eru bara með endalaust af góðum mönnum sem geta bakkað hann upp, eru með tvo aðra línumenn, það er enginn afsökun fyrir þá. Þeir minnka aðeins róteringuna hjá sér og við göngum bara á lagið. Við vitum hvað við erum góðir og sýndum hraðann okkar í dag og hann verður bara hraðari og hraðari þegar lengra líður á einvígið.“

Björgvin Páll segir frammistöðuna í leiknum vera gott veganesti í næsta leik sem fram fer í Kaplakrika á mánudaginn.

„Þetta er mjög gott veganesti, sér í lagi þar sem við erum í vandræðum í leiknum. Við erum í vandræðum í fyrri hálfleik. Ég tek langan kafla þar sem ég ver ekki neitt, en samt vinnum við. Þetta verður líklega langt einvígi en hver leikur er 60 mínútur og við ætlum bara að skila því í hús hverju sinni.“