Ægir Þór óttaðist að ferlinum væri lokið

Ægir fór sárkvalinn af velli í leiknum gegn KR fyrr í vikunni og var ljóst að eitt­hvað al­var­leg hafði gerst. Hann var fluttur með sjúkrabíl á sjúkrahús og seinna kom í ljós að Ægir hafði oln­boga­brotnað en án síns leið­toga stigu Stjörnu­menn upp og unnu leikinn, sem var tvíframlengdur, og tryggðu sér sæti í undanúr­slitum.

„Upp á spítala var ég bara mjög lyfjaður og eðlilega mjög glaður með að við skyldum ná að sigra þetta,“ segir Ægir í samtali við íþróttadeild Sýnar. „Stoltur af strákunum fyrir að hafa náð að kreista þetta fram. Sýnir kannski að þegar það er smá mótlæti þá getur það þjappað mönnum saman. Það var mikil gleði. Svo kannski sest maður smá í tilfinningarnar. Að meiðast. Geta ekki tekið meira þátt. Þá verður maður sorgmæddur. Núna er það að rífa sig upp úr því og takast á við næsta verkefni.“

Gerði sér von um snögga endurkomu

Nákvæma tímasetningu er varðar endurkomu Ægis er erfitt að koma með en hann er sjálfur brattur.

„Þetta geta verið þrír mánuðir, plús eða mínus. Ég veit það vel að ég er í mjög góðum höndum. Sér­stak­lega innan Stjörnunnar. Ég er með svo mörg álit, marga menn sem eru mjög færir í því sem þeir gera. Ég er mjög vongóður um að ná góðu bata­ferli.“

Áfallið við það lenda í þessu og meiðast stórt því úrslitakeppninn er nú í fullum gangi. Annað smávægilegra áfall, þegar að Ægir var farinn að fá smá von um snögga endurkomu, kom síðan skömmu seinna. 

„Ég fór í myndatöku til að sjá hver staðan væri á olnboganum. Þá hafði hann farið úr lið og spurning hvort hann væri brotinn líka. Það reyndist rétt. Ég er bara svæfður og þeir setja olnbogann í lið. Það er tekin mynd og honum og sést þá að hann er brotinn líka. Ég var mjög vongóður um einhvers konar endurkomu þegar að ég vissi að hann væri úr lið en svo þegar ég heyrði af því að hann væri brotinn þá fór sú von að það væri einhver endurkoma fljótlega.“

Vonbrigði eftir krefjandi tímabil

Svekkelsið mikið. 

„Ég held að þetta tímabil hafi líka verið dálítið þannig hjá mér. Það var krefjandi líkamlega. Síðustu ár hafa verið krefjandi líkamlega fyrir mig en ég hef alltaf komist í gegnum það. Spilað í gegnum lítilsháttar eymsli. Þetta setti svona punktinn yfir i-ið. Það er búinn að fara mikill kraftur og orka í að halda sér gangandi. Það voru vonbrigði að geta ekki verið með strákunum og spilað með þeim af því að það er mikill kraftur sem fer í það. Ég mun taka að mér nýtt verkefni innan liðsins. Ég er bara mjög spenntur fyrir því, er búinn að tala við strákana og við erum strax farnir að huga að næstu seríu.“

Óttaðistu um ferilinn?

„Já vissu­lega. Ég ætla ekkert að ljúga því. Í þessu ferli, það eru búnir að líða tveir dagar núna. Þá getur maður lagst það djúpt að maður sé nánast bara hættur í körfu­bolta. Auðvitað getur maður gert það. En það eru bara ein­hverjar aðrir raddir að segja það inn í hausnum á mér.“ 

„Ég er það vongóður, í það góðum höndum, að ég trúi því að ég komi sterkari og betri inn á völlinn þegar líður á. Þetta eru alltaf bara ein­hver smá skila­boð, ein­hver svona at­vik. Ég á bara að fara í gegnum þetta. Þetta er ekkert flókið ferli. Ég er búinn að rísa upp úr þessu myrkri sem ég var í. Að það væru ein­hver enda­lok að oln­boga­brotna. Það verður bara upp og áfram.

Mér líður vel í líkamanum. Þetta verður alltaf meira og meira krefjandi er varðar endurheimt. En mér líður vel, þetta eru ekki alvarleg meiðsli, miðað við hvað hefði geta gerst. Ég er ofboðslega vongóður og finnst enn þá gaman í körfubolta.“

Pressan á Tindastól

Stór skörð hafa verið hoggin í lið ríkjandi Ís­lands­meistara Stjörnunnar því auk Ægis er lands­liðs­maðurinn Orri Gunnars­son frá vegna kross­bands­slita. Stjarnan mætir Tindastól í undanúr­slita­ein­vígi og er mat margra að þar eigi Garðbæingar ekki séns án tveggja af sínum bestu leikmönnum. Ægir hefur mikla trú á sínum mönnum.

„Heldur betur. Við vorum að fara í gegnum KR-ingana. Strákarnir þjöppuðu sér heldur betur saman til að klára þá seríu og við kláruðu seríu þar sem KR-ingarnir voru ákveðnir favourites. Við tölum líka alveg hreina íslensku með það að ef það myndi vanta Basile eða Taiwo Badmus í lið Tindastóls þá ætti Stjarnan að vinna þá. Ægir og Orri eru ekki með Stjörnunni og Stólarnir eiga að vinna þessa seríu. Pressan er á þeim. Það væri skandall ef þeir vinna ekki þessa seríu.“