Handbolti

Gísli með sjö stoð­sendingar þegar Magdeburg endur­heimti sjö stiga for­skot

Ingvi Þór Sæmundsson skrifar
Gísli Þorgeir Kristjánsson var duglegur að mata samherja sína í dag.
Gísli Þorgeir Kristjánsson var duglegur að mata samherja sína í dag. getty/Ronny Hartmann

Magdeburg náði aftur sjö stiga forskoti á toppi þýsku úrvalsdeildarinnar í handbolta með fjögurra marka útisigri á Göppingen, 23-27, í dag.

Gísli Þorgeir Kristjánsson og Ómar Ingi Magnússon skoruðu tvö mörk hvor og Elvar Örn Jónsson eitt fyrir Magdeburg. Ómar gaf auk þess fjórar stoðsendingar og Gísli sjö.

Lukas Mertens var markahæstur í liði Magdeburg sem hefur unnið sex deildarleiki í röð. Hann skoraði níu mörk úr tíu skotum. 

Matthias Musche og Daniel Pettersson skoruðu fjögur mörk hvor. Öll mörk þess fyrrnefnda komu úr vítum en hann tók við þeim skyldum eftir að Ómar klikkaði á fyrsta víti Magdeburg í leiknum.

Ýmir Örn Gíslason skoraði eitt mark fyrir Göppingen sem hafði unnið fjóra leiki í röð fyrir viðureign dagsins. Göppingen er í 9. sæti deildarinnar með 24 stig.

Magdeburg hefur unnið 24 af 27 leikjum sínum í þýsku úrvalsdeildinni á tímabilinu, gert tvö jafntefli og aðeins tapað einu sinni.

Þýski handboltinn

Mest lesið


Fleiri fréttir

Sjá meira


×

Mest lesið