„Hefði verið leiðin­legt að skora öll þessi mörk og tapa“

„Ég er ótrúlega ánægð með hópinn og liðið. Við gáfumst aldrei upp. Við vorum kannski ekki rólegar, en við tókum bara eina vörn í einu og eina sókn í einu og þetta small í lokin,“ bætti Lovísa við.

Hún segir að það sýni karakter að liðið hafi aldrei farið á taugum þrátt fyrir að lenda í nokkur skipti tveimur og jafnvel þremur mörkum undir í dag.

„Þetta var slatti af einhverjum lúmskum tæknifeilum hér og þar. Kasta boltanum frá okkur eða eitthvað svoleiðis. En við náðum alveg að halda ró og bara anda inn og út. Svo var þetta bara að taka eitt í einu og þá small þetta. Það þýðir ekkert að hugsa eitthvað mikið lengra í hadnbolta. Stundum ætlar maður sér að skora þrjú mörk í einni sókn, en þá fer bara verr.“

Valsliðið hefur verið að glíma við mörg og mikil meiðsli undanfarið og Lovísa þurfti því að bera þungan af sóknarleik liðsins í dag. Óhætt er að segja að hún hafi gert það með glæsibrag, en hún skoraði hvorki fleiri né færri en 15 mörk og þar á meðal sigurmarkið á lokasekúndu leiksins.

„Ég tek bara mínu hlutverki bara eins og það er og reyni að gera mitt besta fyrir liðið. Þetta small saman í dag og bara heppni að það gerðist. Ég reyndi bara að gera mitt besta fyrir liðið og þetta á ekki að vera svona. En þetta gerðist í dag og það er bara gott að við unnum leikinn. Það hefði verið leiðinlegt að skora öll þessi mörk og tapa,“ sagði nokkuð hógvær Lovísa.

Með sigrinum eru Valskonur svo gott sem búnar að tryggja sér deildarmeistaratitilinn. Liðinu nægir eitt stig í viðbót, en í raun mætti Valur tapa síðustu tveimur leikjunum, ef liðið tapar ekki með meira en sjö mörkum gegn ÍBV í lokaumferðinni.

„Við þurfum bara að halda áfram að þróa okkar leik. Við eigum tvo leiki eftir í deildinni og mikilvægur leikur fyrir norðan næst. Við þurfum bara að vinna alla leiki sem í boði eru og halda áfram að stilla saman strengi. Við erum alltaf að byggja upp liðið því það eru skakkaföll og maður að koma í manns stað og það þar alltaf að aðlagast því. Við erum að gera það vel og við þurfum að halda því áfram.“

Hún segir einnig að þetta sé tækifæri fyrir yngri og óreyndari leikmenn að sýna hvað í þeim býr.

„Þær eru að gera það sjúklega vel. Þær eru alltaf að fá aukna ábyrgð og taka mikilvægar ákvarðanir á mikilvægum tímapunktum, sem er gott fyrir þeirra reynslubanka. Þær eru að standa sig vel og það er líka gaman að fá að vera með þeim í því. Ef ég get hjálpað þeim eitthvað þá er það líka mjög ánægjulegt.“