Tveir í varð­haldi vegna hópárásar í mið­bæ

Greint var frá því í dag að fjórir karlmenn hefðu verið handteknir eftir alvarlega líkamsárás í miðborginni í nótt. Karlmaður var fluttur frá vettvangi alvarlega slasaður.

Lögregla greinir nú frá því í tilkynningu að Héraðsdómur Reykjavíkur hafi úrskurðað tvo af þessum mönnum í vikulangt gæsluvarðhald á grundvelli rannsóknarhagsmuna að kröfu Lögreglunnar á höfuðborgarsvæðinu.

Hinir mennirnir eru lausir úr haldi lögreglu.

Lögreglunni á höfuðborgarsvæðinu barst tilkynning vegna líkamsárásarinnar. Þegar á vettvang var komið voru þeir grunuðu á bak og burt en þeir voru handteknir annars staðar í borginni í nótt.

Sá sem varð fyrir árásinni er karlmaður á fertugsaldri. Hann var fluttur á slysadeild með talsverða áverka. Líðan hans er sögð eftir atvikum.