„Al­gjör rússibani“

Oft komu langir kaflar í leiknum þar sem annað hvort liðið var í bölvuðum vandræðum með að skora. Aðspurður af hverju leikurinn var jafn sveiflukenndur og raun bar vitni hvað varðar það, þá hafði Anton þetta að segja.

„Þetta er bara bikarúrslit. Tvö frábær lið og Haukarnir unnu þetta í fyrra og við búnar að mæta þeim oft í vetur og hörku leikir. En ég fann það að ef við myndum komast í þetta móment að jafna þá myndum við taka þær.“

Valur var fjórum mörkum undir þegar korter var eftir og Haukar með pálmann í höndunum. Á þeim tímapunkti tekur Anton leikhlé og viðsnúningurinn hefst. Valur skoraði næstu sjö mörk og tryggði sér titilinn með þessum frábæra kafla. En hvað gerðist í þessu leikhléi?

„Við fórum bara aðeins yfir hlutina og náðum að skerpa á nokkrum hlutum varnar- og sóknarlega og mér fannst það auðvitað virka og bara margar sem stigu upp.“

Eftir þetta umrædda leikhlé kom Thea Imani Sturludóttir inn í sóknarleik Vals, en hún hefur verið að glíma við meiðsli og lítið spilað undanfarna mánuði. Var þetta í fyrsta skipti sem hún kom inn í sóknarleik Vals í leiknum og jafnframt í fyrsta skipti í leiknum sem Valur tefldi fram örvhentum leikmanni í stöðu hægri skyttu í leiknum. Öll sóknarógn Vals virtist umbreytast við innkomu hennar og var Anton sammála því.

„Já klárlega. Hún er með sína reynslu og sín gæði. Við erum auðvitað búin að spila mikið án hennar og svo hefur Þórey líka verið að leysa þetta af fyrir utan, en mestmegnis höfum við verið með rétthentar þarna eins og lungann úr leiknum í dag. En auðvitað hjálpar þetta. Mér fannst við bara þétta aðeins varnarlega og fengum markvörslu að sjálfsögðu frá Hafdísi og sóknarlega gerðum við vel á öllum sviðum og náðum að klára þetta,“ sagði Anton að lokum.