Gleymdi sér síðast og beið í 25 ár með að fagna svona

Karl keppir á snjóbretti og vann sigur eftir óhemju spennandi keppni í samhliða stórsvigi. Hann varði þar með Ólympíumeistaratitil sinn frá því fyrir fjórum árum.

Þessu fagnaði Karl með því að rífa sig úr fjórum lögum af klæðnaði og öskra siguröskur ber að ofan, sem vakið hefur talsverða athygli.

Austurríkismaðurinn var að sjálfsögðu spurður út í fagnaðarlætin í viðtali eftir keppni og þá kom í ljós að hann hafði langað til að fagna svona í heilan aldarfjórðung. Hann vildi nefnilega herma eftir samlanda sínum og alpagreinagoðsögninni Hermanni Maier sem var átrúnaðargoð hans.

„Ég hef alltaf viljað gera eins og hann gerði,“ sagði Karl sem gleymdi því hins vegar í Peking fyrir fjórum árum, þegar tilfinningarnar báru hann ofurliði eftir fyrsta Ólympíugullið.

„En núna tók ég sénsinn. Ég var búinn að bíða í 25 ár eftir því að geta pósað eins og Hermann Maier. Núna er ég búinn að ná því og þetta er hápunktur ferils míns,“ sagði Karl hæstánægður.

Bætti met Björndalen um 103 daga

Eins og fyrr segir hefur hann nú bætt aldursmet norska skíðaskotfimikappans Ole Einar Björndalen sem vann Ólympíugull þegar hann var 40 ára og 12 daga. Karl var nefnilega 40 ára og 115 daga gamall í gær.

Sá elsti sem unnið hefur Ólympíugull þegar ekki er aðeins horft til einstaklingsgreina er Skotinn Robin Welsh sem fékk gull í krullu þegar hann var orðinn 54 ára og 102 daga gamall.