Fór í flug­tak af ak­braut og hafnaði úti á grasi

TV 2 greinir frá atvikinu í morgun og hefur eftir farþegum úr vélinni, en myndband frá farþega sýnir hvar vélin var komin út í kant við brautina. Flugstjóri hafi upplýst farþega um að vélin hafi „hemlað kröftuglega“ þar sem reynt hafi verið að taka á loft af akbraut, en ekki eiginlegri flugbraut.

Anders Bork Hansen var meðal farþega í vélinni en í samtali við TV 2 segist hann hafa verið skelkaður við atvikið, enda hafi vélin verið alveg á leiðinni í flugtak þegar henni var skyndilega bremsað harkalega. „Þegar við vorum komin á það mikinn hraða að hún var við að fara í loftið þá grípa bremsurnar í, allir flipar á vængjunum opnast og vélin fer í bakk svo það hristist allt,“ segir Hansen við TV 2.

Samskiptastjóri SAS staðfestir við miðilinn að flugferð frá Brussel til Kaupmannahafnar hafi verið aflýst vegna „óreglulegrar uppákomu“. Þá verði farþegum vélarinnar fundið annað laust flug til að komast áleiðs til Kaupmannahafnar í dag.