Þurrkuðust út af þingi en sitja á tugum milljóna króna

Vinstri græn guldu afhroð í þingkosningunum í nóvember í fyrra og misstu alla átta þingmenn sína. Svandís Svavarsdóttir tilkynnti nýlega að hún ætlaði ekki að sækjast eftir formennsku í flokknum á næsta landsfundi. Hún tók við formennskunni eftir að Katrín Jakobsdóttir sagði af sér þingmennsku til þess að fara í forsetaframboð í fyrra.

Mesti kostnaðurinn við kosningabaráttu flokksins var vegna auglýsingakaupa, tæpar 18,7 milljónir króna samkvæmt ársreikningi sem Ríkisendurskoðun hefur farið yfir. Hvert einasta þeirra innan við fimm þúsund atkvæða sem flokkurinn fékk í kosningunum kostaði hann rúmlega 5.300 krónur.

Þrátt fyrir útgjöldin töpuðu Vinstri græn áðeins tæplega 1,2 milljóna króna á rekstrinum í fyrra. Tekjurnar námu tæpum 120 milljónum króna en gjöldin rúmri 121 milljón.

Eigð fé flokksins nam tæpum 49,6 milljónum króna við lok árs og haldbært fék rúmum 45,2 milljónum.

Mestu styrkirnir úr eigin ranni

Meirihluti tekna VG kom frá ríkissjóði, alls 87,3 milljónir króna. Þá fékk þingflokkur VG, sem er ekki lengur til, rúmar 10,5 milljónir króna frá Alþingi.

Sjö fyrirtæki styrktu flokkinn um samtals tæpar 1,8 milljónir króna. Hæsti einstaki styrkurinn kom frá Arion banka sem gaf VG 500 þúsund krónur, fimmtíu þúsund krónum undir lögbundnu hámarki slíkra framlaga. Ölgerðin styrkti flokkinn um 400 þúsund krónur og Kaupfélag Skagfirðinga um 300 þúsund.

Einstaklingar styktu flokkinn um rúmar 11,2 milljónir í fyrra en meirihluti þess fjár kom frá kjörnum fulltrúum flokksins, frambjóðendum og stofnendum. 

Þáverandi ráðherrarnir Bjarkey Olsen Gunnarsdóttir og Guðmundur Ingi Guðbrandsson gáfu hámarksupphæðina, 550 þúsund krónur, og Svandís Svavarsdóttir 540 þúsund. Hjónin Steinunn Þóra Árnadóttir, þáverandi þingmaður flokksins, og Stefán Pálsson, sagnfræðingur, gáfu hámarksupphæðina hvort. Orri Páll Jóhannsson, þáverandi þingmaður flokksins, gaf 545 þúsund krónur.