„Í öllum góðum hópum er alltaf einn sem labbar aftur á bak“

Grindvíkingar voru orðnir nokkuð fáliðaðir þegar leið á leikinn en Ólafur Ólafsson og Kristófer Breki Gylfason fóru báðir meiddir af velli og þá var DeAndre Kane sendur í bað eftir að hafa fengið tvær tæknivillur í röð eftir samskipti sín við Kristinn Óskarsson.

Jóhann Þór Ólafsson, þjálfari Grindavíkur, var ansi tilfinningaríkur á hliðarlínunni í fyrri hálfleik og kastaði sér einu sinni í gólfið úr pirringi eftir tapaðan bolta.

„Við vorum að gera barnaleg mistök, sérstaklega í fyrri hálfleik. Vorum með sjö eða átta tapaða bolta, ekki einu sinni undir pressu helmingurinn af þeim. Eðlilega verður maður pirraður á því en ég var svo sem alveg búinn undir þetta. 

Þetta er alltaf svona þegar við spilum hérna, hvort sem það er í Seljaskóla eða hér. Adrenalínið fer alltaf allt upp í botn. Þeir eru góðir í því, að keyra leikinn upp í einhverja vitleysu og við höndluðum það alls ekki nægilega vel. En góður sigur og við tökum tvö stig.“

Grindvíkingar voru seinir í gang og virkuðu frekar værukærir í fyrri hálfleik en spiluðu mun betur í seinni hálfleik að mati Jóhanns.

„ÍR-ingarnir búa sér til fullt af opnum skotum í fyrri hálfleik og hitta bara ekki. Vorum tveimur yfir í hálfleik og þriðji leikhluti er mjög góður, sérstaklega varnarlega og er það sem brúar bilið hérna í kvöld fyrir okkur. Við vorum mjög góðir þá og lungann úr leiknum bara fínasta frammistaða. Eins og ég segi, alltaf erfitt að spila hérna og sáttur með góðan sigur.“

Aðspurður um meiðsli fyrirliðans, Ólafs Ólafssonar, sagði Jóhann að það hefði fyrst og fremst verið varúðarráðstöfun að láta hann hvíla í seinni hálfleik.

„Við tókum bara ákvörðun í samráði við Stretskó [sjúkraþjálfari Grindavíkur, innsk. blm.] um að hann myndi bara sitja seinni hálfleik. Hann verður klár á fimmtudaginn held ég.“

Fastir liðir eins og vanalega

Leikurinn leystist upp í algjöra vitleysu undir lokin. Kane rekinn í bað, mikið brotið og Hákon Örn Hjálmarsson, leikmaður ÍR, var einnig sendur í bað fyrir óíþróttamannslegt brot. Jóhann er þó orðinn flestu vanur þegar kemur að DeAndre Kane.

„Þetta gerist einu sinni á ári, búið að gerast síðustu þrjú ár. Ég er búinn að gera mitt, ég er búinn að spjalla við hann og hann er búinn að biðjast afsökunar á þessu. Svo er það bara þeirra sem stýra skútunni fyrir utan völlinn að ákveða hvert framhaldið verður. Ég var að horfa á Last Dance aftur, og þar talaði Phil Jackson um það að í öllum góðum hópum er alltaf einn sem labbar aftur á bak. Við skulum bara hafa það þannig.“

Grindvíkingar taka á móti Tindastóli í næsta leik og Jóhann er fullur tilhlökkunar, þrátt fyrir að leikurinn sé á fimmtudegi en grindvískir stuðningsmenn hafa kallað eftir því að leikurinn verðir færður á föstudag.

„Bara eins og flestir leikir í þessari deild. Stólarnir náttúrulega með hörku lið og vel mannað. Það verður bara risa verkefni. Það verður gaman að fá þá heim í Grindavík. Grindavík hefur verið þeirra annað heimili það sem af er hausti. Bæði lið á „heimavelli“ og vonandi bara geggjuð stemming í húsinu og fullt hús eins og hefur verið. Skora bara á mitt fólk að þó það sé fimmtudagur þá er alveg hægt að fá sér einn tvo og „haffa gaman“. Það er bara fulla ferð og við látum vaða á það.“