Kristófer fjar­lægir sig frá Coolbet fjöl­skyldunni

Kristófer greindi frá ákvörðun á Instagram í gær, þar sem hann tilkynnti að hann væri orðinn meðlimur „Coolbet fjölskyldunnar“.

„Það verða pottþétt einhverjir ósáttir, en sjitt maður, ég er vanur því,“ sagði Kristófer í tilkynningunni sem hefur nú verið eytt af Instagram.

Kristófer birtist svo í auglýsingu Coolbet á samfélagsmiðlinum X í gærkvöldi, þar sem fólki var ráðlagt í veðmálum fyrir nokkra af körfuboltaleikjum gærkvöldsins.

Þar af voru tveir leikir í Bónus deildinni sem Kristófer spilar sjálfur í.

„Það hryggir mig mjög að Kristófer fari þessa leið til að þéna peninga,“ sagði Hannes S. Jónsson, framkvæmdastjóri KKÍ, í samtali við Vísi.

Myndböndin sem Kristófer setti á Instagram og myndin sem Coolbet birti á X hafa nú verið fjarlægð. Kristófer er hvergi sjáanlegur á samfélagsmiðlum Coolbet og sömuleiðis er Coolbet hvergi sjáanlegt lengur á samfélagsmiðlum Kristófers.

Á Instagram reikningi Kristófers má þó enn finna myndir af honum í fatnaði frá veðmálafyrirtækinu Betsson, en eðlismunur er þar á, vegna þess að Kristófer auglýsir veðmálastarfsemi fyrirtækisins ekki með beinum hætti þar eins og hann gerði fyrir Coolbet í gær.

Stjórn körfuknattleiksdeildar Vals vildi ekki tjá sig um málið þegar Vísir leitaði viðbragða og þrátt fyrir ítrekaðar tilraunir hefur ekki náðst í Kristófer Acox.